أخبار

Friday, March 21, 2008

كده وكده ..

في إطار خطة الإصلاح التي تقوم بها الحكومة تقرر أن يكون المثل الشعبي : الباب اللي يجي لك منه الريح .. ماتسدوش وحاول تتأقلم






يبدو أن الاتفاقات الدولية التي تتم على مستوى العالم العربي لا ينطبق عليها إلا مثل واحد فقط وهو :"روحت اجيبك يا عبد المعين .. مالقيتكش أصلاً"





عملاً بمبدأ القياس نطالب السادة المسئولين بوضع شعار على جميع المصالح الحكومية نصه
"إحترس.. الحكومة تدمر الصحة وتسبب الوفاة"





بعد علمه أن الشعب المصري "ياكل الزلط" قرر السيد أحمد عز تغيير نشاطه إلى الزلط


******

بعد تغيير الإخوان المسلمين شعار "الإسلام هو الحل" فمن المتوقع أن يقوم مجلس الشعب بإضافة مادة جديدة للدستور نصها " يمنع أي
حزب يحتوي على أي أساس لأي حاجه في أي اتجاه"




اقترح أحد المواطنين أن يتم اختيار رئيس وزراء قصير .. من باب التغيير يعني

******

خلال تصفحي لموقع الحزب الوطني وجدت تساؤلاً في صفحة القراء حول تقدم السيد جمال مبارك في الدورة الرئاسية القادمة وكان نص الإجابة كالآتي : "شكراً على اتصالك وعلى روحك الطيبة"





بعد النجاح الباهر الذي حققته "شيكاجو" بعد رواية "عمارة يعقوبيان" لعلاء الأسواني والنجاح المنتظر أن تحققه رواية "على سرير رجل إيطالي" .. للروائي الشاب محمد صلاح العزب .. قرر أحدهم أن يؤلف رواية بعنوان .. يمنع لدون الثامنة عشر
********

بعد بدء الانتخابات التمهيدية للمحليات وفقاً للنظام الجديد بدأ الشعب يفهم نسبياً القاعدة التي ينفذها الحزب الوطني هذه الأيام وهي "الأمور
المتشعبة من النقطة المنبثقة الوحدوية لا تجد ائتلافاً عن الجانب الآخر" .. أيوه .. تمام كده .. خليك متنح
********

بالصدفة فتحت التلفزيون على إحدى قنوات المسابقات فوجدت صورة لعبد الحليم حافظ ونص السؤال"لمن هذه الصورة؟!" .. فأغلقت التلفزيون علي الفور .. ولكني فتحت نفس القناة في اليوم التالي فوجدت نفس السؤال لم يتغير





أعلنت الفنانة إلهام شاهين أكثر من مره أن "مافيش راجل في حياتها" ولكن الغالب أن يكون هذا الاعتراض على صيغة المفرد فقط




بعد تعيين أول "مأذونة" في مصر تساءلت وماذا عن زوج هذه المأذونة الذي يريد أن يتزوج من نفس محل إقامته






لا أعلم لماذا أحدث الناس كل هذه الضجة على هروب الحضري .. كل ما في الأمر انه كان عاوز شوبير يسمعه أغنية .. خايفة لما تسافر

12 comments:

Wael said...

:D

جميله جدا
صحيح : الراجل زوج الماذون " المرأة " لو حب يتجوز هايتجوزازاى ؟ :D

كلها تساؤلات جميلة جدا

ايموشنز للبلوجرز

ضـوء الـقـمر said...

هههههههههههههههههه
حلوة حكاية الحزب الوطني خليك متنح دي
جميلة بجد

موناليزا said...

وماتقولش ايه ادتنا مصر قول هندى ايه لمصر
قوللى يادرش هو انت ماشربتش من نيلها؟جربت تغنيلها؟ههههههههههه

مصطفى حسان said...

وائل :

أولا برحب بيك زائر لمدونتي المتواضعه

أما بالنسبه لزوج المأذونه فده هايطلع عينه اللي يتجوز مأذونه

ضوء القمر :

بنفسك ؟؟ لا لا انا مش مصدق .. قولي كلام غير ده .. حقيقي منوره المدونة والله
طب كنتي قولي لي افرشها أي حاجه لو حتى بطيخ بتنجان أي حاجه يعني

وبلاش الغيبه دي تاني



موناليزا :

لا الحقيقة انا شربت من مجاريها
هو انا عندي سؤال .. هم بيقولوا ان مصر ام الدنيا .. لكن انا عاوز اعرف مين ابوها ؟

صوت من مصر said...

عارف يا درش
بجد اخبارك طازه موت وكمان حلوه حكايه الهام شاهين مع انها كدابه لان كل رجاله مصر فى حياتها صدقنى

شريف طلال said...

درش حبيبى
حلوه الحقن دى واللهى
و طفتس من الضحك
تسلم قلمك يا معلم
تحياتى

Asmaa mahaba said...

ههههههههههههه
جميله قوى وانا بدات افكر فى انى اسبق احمد عز واتاجر فى الزلط
تخيل اول مره اشوف صوره المازونه مكنتش اعرف انها بقصه
تحياتى ليك سومه_87

د/اجدع بنوته said...

هههههههههههههههههههههه

اسلوبك ساخر وجميل جدا

وفعلا ضحكت م قلبى ع هموم بيعتصر ليها قلبى

بجد مبسوطه اوى انى زورت مدونتك

وبستأذنك اكون زائره دائمه ليها

الإتربي اللولبي said...

مفاجأة .. أليس كذلك ؟

إزيك يا واد يا درش ... عامل إيه ف دنيا الديابة ؟؟

و الله إن كانت صيغة المفرد مضايقاها فاسمح لي أكون من ضمن المجموعة عشان " إلهام شاهين ... كلها فيتامين "

أتمنى زيارتك و التعليق ربنا يخليك

mostafa rayan said...

درش تحياتي
اولا : لأننادرشاويين زي بعض
ثانيا: بوست جامد موت

متغيرة شوية said...

جامدين الحاجات دي يا مصطفى

والكاريكاتير اللي فوق بتاع قصيدة بوش تحفة

ا لـعـبـد لـلــه said...

المدونه جامده وحبيتها وان شاء الله أدخلها تاني ولو ان في حاجات قرأتها قبل كده بس مش فاكر فين ...وبدعيك تزور مدونتي المتواضعه وتشرفها يا ريس