حدوتة الشاطر.. مافيش... إبني الأول

صدر مؤخراً عن دار المحروسة للنشر والخدمات الصحافية ديواني "حدوتة الشاطر.. مافيش"

دعواتكوا معايا.. ويا رب الديوان يبقى على قدر المستوى

مقاطع من قصيدة -- الــقــهـــوجـــي

القهوجي..
أحسن طريقة للخروج ع النص
أول ما بتميل الصينية فْ إيده
ويَّا المشيه بالخطوة السريعة
يبقى رزع الكبيات هو الإيقاع للرقص..
ع القهوة ليه دايماً تلاقي التسلية في الرص..

رص الحجارة شيء تملّي بيلفت الأنظار
رص الحجارة م الأساس
هو المقاومة لرهبتك م النار

رص الدومين بيقوي إحساس الامتلاك
ويقرب الأحلام
رص الدومين هو الحقيقة شهوتك
للعب بالأرقام

دايماً بيبقى اللعب ع القهوة وسيلة للهروب م الليل

اللعب بالطابق

بيدي فرصة للمخلوق

يجرب متعة التعديل

أمسية مركز طلعت حرب

مربعــــــــــــــــــــــــات

لا النوم طرف رمشي
ولا قلت مش قدك
فكي الحصار امشي
ما يغرنيش قدك

وهاتيجي من نفسك
قلبي طرف عينك
ما تغركيش نفسك
ده احنا اللي رافعينك

ده انا قلبي صاد عندك
أول ليالي العيد
عندي قصاد عندك
مين فينا مد الإيد

قلبي زمان قابلك
وانتوا اللي موتوه
وقالوها من قبلك
من فات قديمه يتوه

فمتبعديش بيا
ده انا قلبي صيادك
صيد الطيور غيه
ما يهمني عنادك

هو انتي ليه بعدتي
ده انا قلبي كان أوفر
هاتقولي لو عدتي
"الحرب كر وفر"

يا صعبة الصعبين
واخداني ليه مقاوله
هو غرام تعابين
واللا القريب أولى

ده انا قلبي بيعاني
بكره بنات جيلك
تبقي انتي بايعاني
وكمان انا اجي لك

دي العيشه تصبح مر
واجمع وأطرح كام
ربك إذا يأمر
له في الهوا أحكام

أمسية شعرية

عندي ندوة في مركز طلعت حرب الثقافي يوم 29 مارس الساعة 6 مساءً

وهايكون معايا في الندوة الشاعرة المتميزة سمر إمام

هاكون سعيد جداً بتشريفكوا

طلب إعادة نظر .. نيو فيرجين

الواو* .. كي لا ننسى

يا اللي انتَ قلبَك سَرَجْ لي
قرب تعالى وعاتبني
يا رمشِ ونَّـاسِ راق لي
عَ تهد واللا عَ تبني ؟!

*****

يا قلب خلف الصروح
بيني وبينك رحابِه
ده انا قلبي يا قاسي روح ..
دوِّرْتِ حَجْرِ الرحى بِهْ !

*****

وشَبَطْت يدِّي فْ قَميصِك
يا صعبه فين سهلِك ؟!
ما واخدش عاد عَ قِميصِك
واللا انتي تنسي اهْلِك ؟!

*****

يا حلو ما تسوقش تقلك
ده احنا اللي بعدك عانينا
بتبعد انت واتوق لك
وهواكِ شيلناه فْ عينينا

*****

يا طير بيخنق في طيرَهْ
ولا بشتكي له زِماني
والدنيا يا بوي مطيرَهْ
وانا دمعتي ملازِماني

...........................................

الواو أو المربعات كما يطلق عليه البعض هو فن سماعي من الدرجة الأولى حيث يعتمد في أغلب الأحيان على اللهجة (الصعيدية غالباً) ويجزم البعض أن منشأه هو جنوب مصر، وعلى وجه التحديد أول ما وصلنا منه كان لـ "أحمد بن عروس" ومن أهم الشعراء الذين اشتهروا بكتابة هذا اللون من الشعر هو الشاعر القنائي عبد الستار سليم الذي عمل جاهداً على إحياء هذا الفن.. ويتكون هذا اللون من أربع شطرات بقافيتين على التوازي ويعتمد في قوافيه غالباً على الجناس الناقص أو حتى الجناس التام