أنا مش فاهم حاجة
من حوالي يومين اتصل عليا واحد قال ايه خير اللهم ما اجعله خير ..
أنا المخرج / فلان الفلاني ... من قناة فواصل -
خير .. أي خدمة -
حضرتك الشاعر / مصطفى حسان؟ -
أيوة أنا -
احنا رشحنا حضرتك عشان تشارك في مسابقة قصيدة التحدي .. مسابقة في شعر العامية .. على مستوى الوطن العربي -
( طب إزاي في شعر العامية وعلى مستوى الوطن العربي ؟ يعني ازاي هاتقارن بين أكتر من لهجة بالإضافة إلى أن كل لهجة لها قواعدها المختلفة تماما )
وهايكون المركز الأول جايزته مليون ريال -
( أنا متهيألي مافيش مشكلة في موضوع اللهجات ده خااااالص .. أنا أصلا ممكن أكتب شعر خليجي عادي يعني )
المهم انا أخدت منه العنوان والميعاد وروحت .. وياريتني ما روجت .. لقيت شوية شعراء كتير قاعدين روحت قاعد معاهم .. ويعدين الشاعر الكبير قوي جدا خالص سيد حجاب .. وشوية ناس كتير من الخليج .. المهم المذيع الخليجي اللي مع سيد حجاب مالوش أي لازمة أصلا يا دوب يطلع يقول الان مع شاعر جديد والشاعر يعرف نفسه ويقول القصيدة يقوم المذيع يقول نسمع التعليق سيد حجاب يفضل ربع ساعة يتكلم عن القصيدة وبعد ما يخلص المذيع يقول بالتوفيق وخلاص على كده .
تخيلوا أحيانا كانوا بيخلوه يعيد كلمة بالتوفيق دي .. انا فعلا مش عارف ايه يعني مش عارف يقول كلمة .. ( بالتوفيق ) سهلة خالص ومافيهاش مشكلة ... ده غير المذيعة اللي اتنقطت منها كل شوية يقطعوا التصوير عشان تعيد نفس الجملة عادوا اكتر من خمس مرات عشان جملة واحده .. اللي هايجنني ان المخرج كل ما يوقفها يقول لها هايل بس معلش بس الجملة هاتقوليها بالطريقة الفلانية .. وماانفعلش عليها خالص .. متهيألي لو ممثل عندنا أو مذيع غلط الحجم ده من الأخطاء المخرج ممكن يخبطه بالكرسي اللي هو قاعد عليه .
المهم بدون ما اطول عليكوا بدأ التصوير .. انا كان دوري في التسجيل رقم 12 .. وكان بعدي 2 شعراء بس .. يعني تقريبا معظم الناس خلصت .. قلت القصيدة والحمد لله عديت المرحلة الأولى ...طب المرحلة التانية دي بقى إيه ؟؟
إن أي حد يجاوب عليا مافيش أبدا .. أنا قلت يا واد سيبك من المصريين لانهم دايما فاضحيننا ومش فاهمين حاجه وبيعملوا فيها أبو العريف .. اسأل الخليج بقى اللي هما المفروض أسرة القناة يعني .. اكتشفت إن هم أمر مننا .. الراجل فضل يقول لي كده كلام غريب مافهمتش منه حاجه خالص غير حاجه واحده بس ان المفروض الحلقة دي هاتتذاع على قناة فواصل وهو ما يعرفش امتى ..أمال مين اللي يعرف ؟؟
المفروض ان العشرة اللي اجتازوا المرجلة الاولى ( اللي انا منهم طبعا ) هاتتعرض الحلقة بتاعتهم قريب وفي واحد منهم بس أو اتنين هو اللي هايطلع دبي .. بناءا على درجات لجنة التحكيم وتصويت الجمهور 50% للتحكيم و 50 % لتصويت الجمهور .
طب انا راضي ضميركوا .. هو في مصري هايخلص رصيده على الشعر ؟؟
طب ابقى خلي الشعر ينفعك بقى
إوعوا تفتكروا ان الكلام اللي انا كاتبه ده عشان اقول لكوا صوتولي بقى واتبرع ولو بجنيه وتعاطفك لوحده مش كفاية والكلام ده .. لا لا اللي مهتم هايتفرج واللي مهتم أكتر هايصوت .. والاتنين مافيش فيهم حد سلبي .. لان أساسا في شعراء مش بيتابعوا المسابقات دي .. يبقى ازاي احنا هانطلب من جمهور عادي بيسمع عمرو دياب وتامر حسني ودينا انه يسمع شعر لا ويصوت كمان .. فجأة كده ؟؟ إزاي يعني ؟
سيبكوا من كل ده .. اللي هايجنني بجد العالم الخليج دول بيجيبوا جمهور الشعر ده كله منييييييييييييييييييييين ؟؟
يعني لو حد فيكوا اتفرج على أمير الشعراء وشوفتوا جمهور المسرح كان عامل ازي ؟؟ والناس بتشجع بجد زي ما تكون كورة مش شعر
واللا الناس اللي بتبعت رسايل في الشريط اللي في اخر الشاشة ده ... والتصويت من الجمهور ...
هل الموضوع فعلا له علاقة بالثقافة واللا كلها تجارة .. واذا كان كل ده تجارة .. طب الجمهور ده إيه ؟؟
هو مين فعلا بقى رائد الثقافة دلوقتي الخليج واللا إيه ؟؟
أنا ما عدتش فاهم أي حاجه
**************
تحديث :
معاد الحلقة يوم 6/9/2007
واللي مش هايصوت لي ما يدخلش هنا تاني
علشان انا ديمقراطي جدا
انتهى .......................................................................................
