أخبار

Tuesday, June 19, 2007

أمير الشعراء .. أكشن تاني مرة ( مصطفى الجزار)



تخيل مين اللي هايكون أمير الشعراء بعد أحمد بك شوقي .. ممكن مايكونش مصري .. إيه
رأيك .. تحب يكون مصري ؟؟
إيه يا عم هي دي محتاجة سؤال طبعا كلنا عاوزينه يبقى مصري .
الموضوع بقى إيه ؟؟
أطلقت دولة الإمارات العربية المتحدة مسابقة أمير الشعراء ، وهي مسابقة على مستوى الوطن العربي لشعر الفصحى ، على غرار مسابقة شاعر المليون للشعر النبطي .
واللي هاياخد المركز الأول بغض النظر عن الجائزة المادية في جايزة معنوية مهمة جدا وهي حصوله على لقب أمير الشعراء
طبعا أنا مش بعلن عن المسابقة ولا حاجه أنا جاي اتكلم في حاجه أهم من المسابقة ، وهي إن في شاعر مصري تم اختياره من ضمن أول 35 على مستوى العالم العربي في مسابقة أمير الشعراء وطبعا الخمسة وتلاتين دول هاتبدأ بيهم المسابقة لحد ما يوصلوا في الآخر لخمس مراكز .. طبعا فخر لأي مصري ان شاعر من مصر يفوز في المسابقة دي ..
لكن احنا بقى دورنا فين ؟

دورنا بمنتهي البساطه في تصويت الجمهور ، لأن المسابقة فيها جزء للتحكيم وجزء لتصويت الجمهور ، والبرنامج هايتذاع ان شاء الله كل جمعة
الساعة :
21:45
على قناة :
أبو ظبي
برنامج أمير الشعراء

يعني يا ريت يا جماعة بالإضافة للدعاء شوية رسايل للراجل يدعموه وبلاش البخل ده .. على الأقل دي حاجه أهم بكتير من ستار أكاديمي والحاجات الهبلة اللي كانوا بيعملوها دي وبلاش بقى أنا معاك بقلبي ومعاك بمعنوياتي لا يا خويا انت وهو معنوياتك مش هاتعمل حاجه خالص
.

Friday, June 8, 2007

للمدخنين فقط









للمدخنين فقط

موضوع النهارده غريب شوية لكن هو مهم فعلا .. طب أبدأ إزاي بس في الموضوع ده .. المهم .. طبعا معظمكوا مفكر ان انا جاي اتكلم عن أضرار التدخين والمشاكل الصحية والكلام اللي لا يودي ولا يجيب ده .. انا مش جاي اتكلم عن ده خالص لاني اصلا بدخن ..
باختصار فكرة البوست ده جديدة وغريبة شوية لكن هي قايمة على أساس كل حاجه في الدنيا قايمة على أسس ومباديء .. مافيش حاجه اسمها كده وخلاص .. وكل حاجه لها فنون وإيتيكيت .. حتى الحاجات اللي الناس بتفكر انها في منتهى السهولة .. والبساطة .. بتبقى ظاهرها سهل لكن هي أصلا مش سهله ولا حاجه زي ما الناس مفكره .. المهم ان كل لعبة ولها قواعد .. حتى تدخين السجاير له قواعد وفنون وإيتيكيت ...
- إيه ده بجد ؟؟
- أيوه طبعا .. انتوا مفكرين انها سيبه واللا إيه ؟؟

وانا بصراحه بقالي فتره ملاحظ إن الموضوع بقى سيبه وكل من هب ودب بقى بيدخن وبصراحه الشباب الصغير اللي بيدخن ده بوظ الدنيا خالص ومابقوش يعرفوا أبسط قواعد وآداب التدخين
وانا بقى قلت لازم اعمل موضوع عن إيتيكيت التدخين .. بما إني ليا خبره في المجال ده ..
أولا ) عيب قوي لما يكون معاك ناس حوالي تلاته اربعة وانت بتدخن تروح تهف الدخان على اللي قدامك .. حركة بايخه جدا حتى لو كان اللي قدامك بيدخن .. ماتبقاش تهف الدخان .. يا إما تودي وشك شمال أو يمين وتهوفه .. يا إما لو حواليك ناس كتير ابقى هفه فوق .. يا إما ما تهفوش خالص سيبه يطلع لوحده .. وساعتها لو جه على حد هاتبقى انت مش قاصد .. شوفت بقى الموضوع سهل ازاي.

ثانيا) كتير من المدخنين بتبقى سنانهم وحشة جدا .. ولونها اصفر وتقرف شبه الكلب الجربان .. وتلاقي الواد كمان بيغسل سنانه تلات اربع مرات في اليوم وبرضه سنانه بايظة .. ويروح ينضفها عند دكتور السنان وتبقى زي الفل لكن مسافة شهر بالظبط بترجع زي الأول واوحش كمان .. إنتوا عارفين ده ليه ؟؟
أنا كنت كده .. وعرفت ليه سناني بتبقى صفرا مع اني كنت بغسل سناني بالمعجون كتير قوي ... لحد ما قابلت واحد صاحبي دكتور سنان .. وبيدخن سجاير .. وسنانة بيضا جدا .. على طول توقعت انه بينضفها بحكم انه دكتور سنان يعني .. بس حبيت أتأكد سألته .. قلت له طبعا انت على طول بتنضف سنانك ؟؟ قال لي لا خالص .. بس بغسلها بالمعجون مرتين في اليوم .. الصبح وبالليل .. انا فكرت انه بيشتغلني .. فقلت له يا سلااام معجون بس ؟؟ ومرتين بس في اليوم وسنانك بيضا كده ازاي ؟؟ قال لي يا بني الموضوع مالوش علاقة لا بمعجون ولا بتنضيف ولا طب ولا كلام فارغ من ده .. قلت له امال ايه ؟؟
تخيلوا إيه ؟؟
قال لي : يا ناصح لما تبقى تدخن السيجاره ماتاخدش الدخان على سنانك
انا طبعا رديت عليه قلت له ما باخدوش على سناني
قال لي : يبقى انت بتخرجه من بؤك
قلت له أيوه .. قال لي لا انت تخرجه من مناخيرك .. يا إما تضغط شفايفك على سنانك بحيث شفايفك تغطي سنانك من بره وتخرج النفس .. كده سنانك مش هاتصفر خالص

ثالثا ) لازم تمسك السيجارة في إيدك الشمال بما إنها من الخبائث .. يعني ماتبقاش ماسكها في إيدك اليمين وييجي حد يسلم عليك وتقوم انت مسلم عليه وإيدك فيها السيجاره عيب قوي يعني .. واللا يا سلام بقى لو بنت اللي جايه تسلم عليك هاتسيب إيدها معلقة وحضرتك بتنقل السيجاره من اليمين للشمال .. هايبقى منظرك ومنظرها غبي جدا وماعادتش هاتتكلم معاك تاني أصلا .

رابعا ) لما تبقى تدخن ما تبقاش تحط السيجاره في نص شفايفك .. شبه ماتكون بتدخن شيشة مش سجاير .. ابقى خدها على طرف شفايفك لا إما اليمين أو الشمال أي حاجه المهم ما تبقاش لا في النص قوي ولا ع الطرف قوي . أصل بجد بيبقى منظر غبي جدا .

خامسا) إوعى تدخن في الأماكن المغلقة ( لما يكون فيها ناس كتير بس) لكن لو فيه ناس قليله .. اتنين تلاته مثلا .. وانت شايف ان مش سيجارتك اللي هاتجيب لهم انشكاح في العمود المرتاح يعني ابقى دخنها يا سيدي لو حازقاك قوي .. بس ما تستحلاهاش يعني .

سادسا) في أماكن ما ينفعش تدخن فيها خالص .. زي وسائل المواصلات مثلا .. خصوصا التاكسيات .. واللا يا سلام لو انت راكب في الكنبة اللي ورا السواق .. وهو ما بيدخنش وانت روحت مدخن .. هايبقى مخنوق منك جدا .. على فكره بقى كمان عيب قوي انك تدخن وانت راكب ورا حتى لو كان السواق بيدخن .

سابعا) تخيل نفسك لو انت راكب تاكسي وخرمان على الاخر .. خلاص بقى مش قادر تستحمل المشوار يعني .. ونفسك تدخن .. ساعتها تبقى تقعد قدام جنب السواق .. وماتقعدش ورا .. وتطلع علبة السجاير بتاعتك وزي الأمور كده قبل ما السواق يلحق يتكلم تروح عازم عليه ... لا إما يدخن لا إما يطلع ما بيدخنش .. لو دخنها يبقى كويس جدا .. وهاتضمن انه مش هايقول لك التدخين ممنوع .. أو مش هايقول لك طفيها .. طب تخيل ان السواق طلع ما بيدخنش .. ولو ان انا مستبعد دي لان سواقين التاكسي من اللي بيشوفوه ياعيني ممكن يشربوا أي حاجه .. المهم لو طلع ما بيدخنش .. تروح انت مدخن السيجارة بتاعتك عادي جدا ... لو حسيت انه عادي يبقى عادي .. لكن لو حسيت انه بدأ يكح وهايقرفك .. على طول قبل ما يقول لك طفى السيجارة تقول له الدخان بيضايقك ؟؟ أطفى السيجارة ؟؟
طبعا هايتحرج يقول لك طفيها .. أكيد في ناس ما عندهاش دم وممكن يقول لك طفى السيجارة برغم كل اللي فات ده .. طبعا لو بعد كل ده وقال لك ايوه طفيها على طول تروح مكلمه في أضرار التدخين وانك أصلا عاوز تبطل من زمان لكن ظروف الحياة بقى والمشاكل وفلسطين وأفغانستان وسلم لي ع الترماي ... وطبعا في وسط كل الحوارات دي هو هايتعاطف معاك ويشجعك انك تبطل وهاينسي انه كان بيقول لك طفى السيجارة ، بعد كل ده لو قال لك طفيها برضه .. أكيد هاتكون السيجاره خلصت أصلا ..

ثامنا) لو دخلت مكان عام محطوط فيه لوحة مكتوب عليها ( ممنوع التدخين) ، في الحالة دي لو عاوز تدخن دخن عادي .. هاتسألوني ليه؟؟ اقول لكوا انا ليه ؟
لان فيه قانون بيمنع التدخين في الأماكن العامة .. واللافتة دي محطوطه عشان كده بس مش عشان في ناس بتتضايق من التدخين ولا حاجه والمصريين معظمهم بيخالف القانون أصلا






لكن خلى بالك من حاجه مهمه جدا أحيانا لوحة ممنوع التدخين دي بتبقى مكتوبه بخط الإيد .. في الحالة دي إوعى تدخن .. لان واضح ان واحد هو اللي كاتبها .. وبما إنه هو اللي كاتبها بإيده يعني دي بناء على اقتراح شخصي مش من مال الحكومة يعني .. يعني الراجل ده بيتضايق من التدخين .. ولو شافك بتدخن على طول هايدخل يردحلك ويفرج عليك حضارة السبع تلاف سنه .. لان حضرته كاتب لافته مكتوب عليها ممنوع التدخين .. وحضرتك ما بتشوفش .. ومثال للشاب المستهتر اللي مش هامه حد ...

تاسعا) طبعا لجان الامتحان بيبقى ممنوع فيها التدخين غالباً .. لكن أحيانا بيسمحوا بالتدخين في بعض الامتحانات .. زي امتحانات الدراسات العليا والدبلومات .. طبعا لو انت قاعد في لجنه وسمحوا بالتدخين في الامتحان إوعى تدخن لان بيبقى عيب جدا يعني .. لكن لو انت ما بتدخنش حاول تستغل الفرصه وتاخد أي سيجاره من اللي جنبك وتولعها وتهوف الدخان في اللي حواليك عشان مايعرفوش يحلوا ..

عاشرا) ده بقى آخر حاجه أنا هاتكلم فيها وأهم حاجه .. في ناس كتير بتدخن لكن لو حد معين عرف انهم بيدخنوا هاتبقى مشكله .. ما اقصدش الأهل .. لو انت اتحطيت في موقف زي ده وحد عزيز عليك شافك وانت في ايدك سيجاره .. إوعى تعمل الحركه الغبية وترمي السيجارة من إيدك .. لانه شافك بيها وكده عرف انك رميتها إعرف على طول انك كده سقطت أكتر في نظرة لانك أصلا خايف تواجهه بيها .. ومحرج وانت ماسكها .. يعني مش بتعمل ذنب بس .. ده انت كمان ما لكش شخصية .. لا ما ترميهاش ولا حاجه .. وسلم عليه عادي .. بس الفرق انك ما تخدش من السيجاره نفس وهو معاك .. إحتراما له بس مش أكتر . واتكلم معاه عادي جدا .. مش هاتموت يعني ولا حاجه .
اما بقى لو والدك هو اللي شافك وفي إيدك سيجاره .. برضه ما ترميهاش هي هاتقع لوحدها ..
اخر حاجه انا نسيت اقولها لكوا .. لما تبقى مروح البيت واهلك ما يعرفوش ان انت بتدخن .. ما تبقاش تستخدم معطر فم عشان ريحة الدخان .. ولا تاخد نعناع .. لانهم هايعرفوا انك بتستخدم معطر فم ومعنى كده انك بتدخن... ابقى قول لهم انك بتدخن احسن .. ابوك هايتخنق منك شوية ولما يلاقيك مصمم على موقفك هايشجعك هو بعدين .. ومش بعيد يعترف لك انه بيشرب حشيش واللا حاجه وبدل ما تدخنوا مع بعض تحششوا مع بعض



ده بالنسبة لإيتيكيت التدخين للجنس الخشن .. أما بقى الجنس الناعم فده مشكلة المشاكل ... طبعا صعب اكتبه هنا في نفس البوست لاني طولت قوي .. لو انتوا عاوزينه استنوا مني بوست تاني عن الموضوع ده ..