أخبار

Monday, October 29, 2007

بطعم وريحة الزبدة الفلاحي .. وتحدي



كان زمان الواحد لما يروح يتقدم لواحده ، يبعت بعض النساء من عائلته علشان يشوفوها الأول علشان عيب هو يشوفها أو على الأقل يشوف صورتها ، كل ده كان عيب فكان الراجل زمان غالبا بيتجوز على عماه ، يعني وهو مغمض عينه ويا صابت يا خابت .. زي اللي رايح يشتري بطيخه ويا إما تطلع حمرا يا تطلع قرعا .. مع الفارق الشديد لأن البطيخة لو طلعت قرعا بتترمى وبنشتري غيرها إنما ده صعب يحصل بالنسبه للزواج .. فالزواج هو الرباط الوثيق ( ده غير رباط الجزمة طبعا ) ، ثم إن البطيخة ممكن تتفتح قبل ما نشتريها إنما مع البنت فده بيكون ..... بلاش بلاش عشان الرقابة .
المهم الشاهد من الكلام إن الرجاله زمان أيام جدي وجدك والجنيه الجبس وأيام الست أم عتريس الخاطبة كانوا بيتجوزا على عماهم .... دلوقتي الأمر اختلف طبعا .. وأكيد أنا مش هاشرح الفرق عشان كلنا عارفين ومش ده الموضوع اللي هاتكلم فيه .
ركزوا معايا بقي شوية عشان هنا بدأت تظهر المشكلة .. طبعا تطور الزمن وبدأ عصر الانفتاح ( ما حدش يفهم غلط ) بس برضه في مشكله كبيره جداً ... تخيل لو انت رايح تتقدم لبنت ولقيتها بنت جميله جدا واتجوزتها لكن في ليلة الدخلة وقبل أي حاجة فوجئت بالكارثة إنها مش أنثى ... طبعا ممكن حد يتخيل اني بفترض افتراض خيالي شوية أو ببالغ .. بس بعد التطور العلمي الرهيب الفظيع الشنيع المريع ممكن مش بس البوصة تبقي عروسة .. ده ممكن العرسة تبقي عروسة .. لكن انا مش بتكلم عن الأزمة دي ... انا من الآخر عاوز اتكلم عن التحول الجنسي .

زمان من كام سنه لما كنت اسمع الكلمة دي كنت متخيل ان عملية التحول دي بتكون بس مع الشيميل أو الخنثى يعني ، وتحديدا الخنثي المشكل لكن اتضح بعد كده ان الكلام ده غلط خالص واتضح اني وقتها ما كنتش فاهم أي حاجه في أي اتجاه واتضح انها بقت عادي جدا ان أي حد يغير جنسه ( زي شكة الدبوس ) زي بالظبط ما تكون راكب المترو اتجاه حلوان وبعدين تنزل تغير اتجاه المرج ، هيصة يعني ... وبعد ما شوفت مؤخرا حلقة عن الجنس الثالث وكمية الخنقة اللي أصابتني من المذيعة الستفذة والضيوف اللي عاملين شبه اللعب اللي بتحركها بعض الجهات المجهولة ... البرنامج كان على قناة الراي ( برنامج كويتي ) وجايبين ضيف من إياهم ( بعيد الشر يعني ) والمذيعة قال إيه مسمياه الجنس الثالث ... لا يا ماما ده مش جنس تالت ولا حاجه ده جنس خـ .. ات
ثم إن في فرق شنيع فظيع مريع بين الخنثى وبين المخنث
.

الخنثى واحد ربنا خالقة كده مالوش ذنب في اللي هو فيه يعني فيه مواصفات الذكر والأنثي معا وبيعمل عملية المفروض يكون اسمها تثبيت الجنس مش تحول جنسي لأنه ما بيغيرش جنسه ولا حاجه هو بيأكد على جنس وبينحي التاني عشان يعيش زي البشر ...
إنما المخنث ده واحد في مواصفات واحده بس في المظهر الخارجي يعني لا إما ذكر بس أو أنثى ... يعني مثلا بيكون مواصفاته الجسمانية كلها ذكورية لكن حاسس من جواه إنه أنثى ... ده مش جنس ثالث حضرتك ده جنس كلنا عارفينه يعني وكلمة مشهورة قوي بيقولوها للعيال اللي مش ولابد يعني ..
الازمة بقي ان الضيف ما كانش خنثى قبل ما يعمل العملية دي كانت ذكر كامل وقامت بعملية تحول من الخارج فقط يعني مالهاش رحم أصلا .... اللي فقعني بقي الراجل بتاع الشريعة اللي كان قاعد ومحسسني انه بيتكلم عن دين تاني ... وأنا بسأل نفسي هو العالم دي مش مسلمين برضه واللا إيه ؟؟ واللا انا اللي عبيط واللا ايه ؟
واحد من الجمهور بيسألها سؤال بيقول لها .. هو انتي مش قبل العملية كنتي بتمارسي العادة السرية برضه واللا إيه ؟ ردت وقالت أيوه ..... وانا كنت هاتشل لوحدي ... يعني انتي كنتي ولد وبتمارسي العادة السرية ، يعني كنتي بتمارسي حياتك الذكورية عادي مافيش أزمة وشوية وحسيتي ان الوضع كده مش نافع فقلتي تغيري ؟
واللا ممكن الجنس ده يكون زي الموبايل يعني ممكن يتغير كل فترة عشان الملل وكده؟
وبعدين بقي بدأت تحكي عن العلاقات الجنسية اللي عملتها مع الرجاله قبل العملية وبعد العملية وانا اخبط دماغي في شاشة الكمبيوتر واستنى بتاع القانون هايقول إيه ؟
يطلع الراجل بكل برود يقول "عننا في جانون دولة لكويت مافي نص يجرم هاي الجريمة" وانا اخبط دماغي تاني واقول أيوة بس ده شذوذ حضرتك ( دي بتقول قبل العملية يعني الأزمة مش تحول ولا حاجه ) عليا النعمة دي دكر ... دي دقنها خضرا يا جدعان .. اقسم بالله دقنها خضرا ..... واللا تكون الموضه السنه دي كريم أساس اخضر واللا ايه ؟
واستني بتاع الشريعة يطلع برضه بكل برود يقول " أنا لاااازم اعرف الحالة بالضبط قبل العملية من طبيب متخصص علشان اقول الرأي السليم "
طبيب إيه يا عم الحج دي بتقول لك قبل العملية .... واخبط دماغي تاني في الشاشة واقول أيوه بس ده شذوذ حضرتك طبيب إيه ومختص إيه ؟؟؟

أقول جايز الدكتور النفسي هايطلع جدع ويقول حاجه مفيده .. أتاريه امر منهم ، يطلع يقول : " التحولات الفسيولوجية الناتجة عن التركيبات البيولوجيه في الغدد الليمفاوية ...." وشوية كلام كتير انا مش فاهم منه حاجه بس برضه ده شذوذ حضرتك ...



طول الحلقة وهم بيتكلموا عن الفسيولوجية اللي اقطع دراعي اذا كنت جيت جنبها ، وخلصت الحلقة ومافيش أي حاجه اتحلت .

شوية أسئلة جات في دماغي دلوقتي :

هل واحده زي دي لو حبت تدخل حمام عمومي هاتدخل حمام رجالي واللا حريمي ؟؟
يعني لو دخلت حمام رجالي هاتبقي كارثة ، ولو دخلت حمام حريمي فهي أصلا راجل يعني ماينفعش تتطلع على عورات النساء ... طب يعني يعملوا لهم حمام مخصص واللا إيه ؟؟ طب وإذا افترضنا انهم عملوا حمام لوحده للناس دول هايعرفوهم منين .. مش معقول يعني هايحطوا واحد ع الباب ... هو يعني هايعرف منين انها مخنثة ما هو مش هايحسس يعني
.


سؤال تاني تبادر في ذهني وهو اللي انا سألته في الأول خالص .. مش ممكن الواحد لو اتجوز تطلع اللي اتجوزها دي تركيب ، وهو زي لا مؤاخذه البقف مش فاهم أي حاجه وبرضه يعني الراجل معزور مش معقول وهو لسه خاطبها يقول لها اقلعي يا بت أتأكد انتي ذكر واللا انثى ويروح يعمل اشاعات بقي يشوف عندها رحم واللا ماعندهاش والكلام ده كله مش منطقي طبعا .... دي كانت تضربه بالقديمة .

الموضوع ده فكرني بإعلانات السمنة بتاعة زمان لما كانت البت تطلع تتحدي بالسمنة وتقول " بطعم وريحة الزبدة الفلاحي ... وتحدي "

تخيل بقي هل احنا ممكن فعلا ما نعرفش نفرق في ظل عصر العولمة بين الزبدة الفلاحي وبين سمن النخلتين .

الله يخرب بيت العولمة ... وعلى رأي عادل إمام " التوسعية من التوسع والإمبريالية من الأمبره
"

Monday, October 8, 2007

احفظوا الرقم ده 671







يا جماعة الرقم ده مهم جدا

671
671
671
671
671
671


عارفين ده رقم ايه ؟؟

فاكرين الإعلانات اللي كانت بتيجي في التليفزيون اتبرع ولو بجنيه تعاطفك لوحده مش كفاية والكلام القرع ده

الرقم ده بقى اهم من الكلام الفارغ ده كله

عارفين مشكلة الشرق الأوسط
حلها في الرقم ده

عارفين مشكلة فلسطين
حلها برضه في الرقم ده

المهم مش عاوز اطول عليكوا


الرقم ده هايحل أزمة المثقفين في مصر
وهايحل أزمة الشعر
وهايرجع التمثيل الثقفافي لمصر في الخارج
وهاتبقي مصر هي رائدة الثقافة


من الآخر الرقم ده ...



الرقم ده يبقي







هاقول اهوه





هاقووووووووووووووول




ده رقم التصويت بتاعي اللي على قناة فواصل في مسابقة الشعر اللي انا قلت لكوا عليها في البوست اللي فات


طبعا كله هايقلع الجزم ويحدفني بيها الوقتي


يجوز كنت بتتريأ بس والله كل الحاجات اللي فاتت دي من أحلامي فعلا




******


طريقة التصويت

ارسل رسالة تتضمن النص الآتي :

ف 671

وابعتها على الرقم الآتي

9288


*******

Thursday, August 16, 2007

أنا مش فاهم حاجة

من حوالي يومين اتصل عليا واحد قال ايه خير اللهم ما اجعله خير ..
أنا المخرج / فلان الفلاني ... من قناة فواصل -
خير .. أي خدمة -
حضرتك الشاعر / مصطفى حسان؟ -
أيوة أنا -
احنا رشحنا حضرتك عشان تشارك في مسابقة قصيدة التحدي .. مسابقة في شعر العامية .. على مستوى الوطن العربي -
( طب إزاي في شعر العامية وعلى مستوى الوطن العربي ؟ يعني ازاي هاتقارن بين أكتر من لهجة بالإضافة إلى أن كل لهجة لها قواعدها المختلفة تماما )
وهايكون المركز الأول جايزته مليون ريال -
( أنا متهيألي مافيش مشكلة في موضوع اللهجات ده خااااالص .. أنا أصلا ممكن أكتب شعر خليجي عادي يعني )
المهم انا أخدت منه العنوان والميعاد وروحت .. وياريتني ما روجت .. لقيت شوية شعراء كتير قاعدين روحت قاعد معاهم .. ويعدين الشاعر الكبير قوي جدا خالص سيد حجاب .. وشوية ناس كتير من الخليج .. المهم المذيع الخليجي اللي مع سيد حجاب مالوش أي لازمة أصلا يا دوب يطلع يقول الان مع شاعر جديد والشاعر يعرف نفسه ويقول القصيدة يقوم المذيع يقول نسمع التعليق سيد حجاب يفضل ربع ساعة يتكلم عن القصيدة وبعد ما يخلص المذيع يقول بالتوفيق وخلاص على كده .
تخيلوا أحيانا كانوا بيخلوه يعيد كلمة بالتوفيق دي .. انا فعلا مش عارف ايه يعني مش عارف يقول كلمة .. ( بالتوفيق ) سهلة خالص ومافيهاش مشكلة ... ده غير المذيعة اللي اتنقطت منها كل شوية يقطعوا التصوير عشان تعيد نفس الجملة عادوا اكتر من خمس مرات عشان جملة واحده .. اللي هايجنني ان المخرج كل ما يوقفها يقول لها هايل بس معلش بس الجملة هاتقوليها بالطريقة الفلانية .. وماانفعلش عليها خالص .. متهيألي لو ممثل عندنا أو مذيع غلط الحجم ده من الأخطاء المخرج ممكن يخبطه بالكرسي اللي هو قاعد عليه .
المهم بدون ما اطول عليكوا بدأ التصوير .. انا كان دوري في التسجيل رقم 12 .. وكان بعدي 2 شعراء بس .. يعني تقريبا معظم الناس خلصت .. قلت القصيدة والحمد لله عديت المرحلة الأولى ...طب المرحلة التانية دي بقى إيه ؟؟
إن أي حد يجاوب عليا مافيش أبدا .. أنا قلت يا واد سيبك من المصريين لانهم دايما فاضحيننا ومش فاهمين حاجه وبيعملوا فيها أبو العريف .. اسأل الخليج بقى اللي هما المفروض أسرة القناة يعني .. اكتشفت إن هم أمر مننا .. الراجل فضل يقول لي كده كلام غريب مافهمتش منه حاجه خالص غير حاجه واحده بس ان المفروض الحلقة دي هاتتذاع على قناة فواصل وهو ما يعرفش امتى ..أمال مين اللي يعرف ؟؟
المفروض ان العشرة اللي اجتازوا المرجلة الاولى ( اللي انا منهم طبعا ) هاتتعرض الحلقة بتاعتهم قريب وفي واحد منهم بس أو اتنين هو اللي هايطلع دبي .. بناءا على درجات لجنة التحكيم وتصويت الجمهور 50% للتحكيم و 50 % لتصويت الجمهور .
طب انا راضي ضميركوا .. هو في مصري هايخلص رصيده على الشعر ؟؟
طب ابقى خلي الشعر ينفعك بقى
إوعوا تفتكروا ان الكلام اللي انا كاتبه ده عشان اقول لكوا صوتولي بقى واتبرع ولو بجنيه وتعاطفك لوحده مش كفاية والكلام ده .. لا لا اللي مهتم هايتفرج واللي مهتم أكتر هايصوت .. والاتنين مافيش فيهم حد سلبي .. لان أساسا في شعراء مش بيتابعوا المسابقات دي .. يبقى ازاي احنا هانطلب من جمهور عادي بيسمع عمرو دياب وتامر حسني ودينا انه يسمع شعر لا ويصوت كمان .. فجأة كده ؟؟ إزاي يعني ؟
سيبكوا من كل ده .. اللي هايجنني بجد العالم الخليج دول بيجيبوا جمهور الشعر ده كله منييييييييييييييييييييين ؟؟
يعني لو حد فيكوا اتفرج على أمير الشعراء وشوفتوا جمهور المسرح كان عامل ازي ؟؟ والناس بتشجع بجد زي ما تكون كورة مش شعر
واللا الناس اللي بتبعت رسايل في الشريط اللي في اخر الشاشة ده ... والتصويت من الجمهور ...
هل الموضوع فعلا له علاقة بالثقافة واللا كلها تجارة .. واذا كان كل ده تجارة .. طب الجمهور ده إيه ؟؟
هو مين فعلا بقى رائد الثقافة دلوقتي الخليج واللا إيه ؟؟
أنا ما عدتش فاهم أي حاجه
**************
تحديث :
معاد الحلقة يوم 6/9/2007
واللي مش هايصوت لي ما يدخلش هنا تاني
علشان انا ديمقراطي جدا
انتهى .......................................................................................

Tuesday, July 24, 2007

أعتذر عن الغيبة دي بجد بجد

بجد بجد بجد أعتذر جدا عن الغيبة دي كلها
لاني الفترة الأخيرة دي بمر بظروف ملخبطة جدا
ومش عارف راسي من رجلي
ولأول مره في حياتي تقريبا أكون مش عارف راسي من رجلي ...
لأني أولا نقلت القاهرة واستقريت خلاص ...
وطبعا عارفين ما يجره هذا القرار من عواقب وخيمة في الأيام الأولى ...
( إيه رأيكوا في الكلام الجامد ده) المهم ان انا فعلا مشغول جدا اليومين دول
فإعذروني إذا كنت ما بدخلش أو ما بردش على التعليقات لأني لسه ما وصلتش نت ... والنت هنا زفت

أشوفكوا على خير

Tuesday, June 19, 2007

أمير الشعراء .. أكشن تاني مرة ( مصطفى الجزار)



تخيل مين اللي هايكون أمير الشعراء بعد أحمد بك شوقي .. ممكن مايكونش مصري .. إيه
رأيك .. تحب يكون مصري ؟؟
إيه يا عم هي دي محتاجة سؤال طبعا كلنا عاوزينه يبقى مصري .
الموضوع بقى إيه ؟؟
أطلقت دولة الإمارات العربية المتحدة مسابقة أمير الشعراء ، وهي مسابقة على مستوى الوطن العربي لشعر الفصحى ، على غرار مسابقة شاعر المليون للشعر النبطي .
واللي هاياخد المركز الأول بغض النظر عن الجائزة المادية في جايزة معنوية مهمة جدا وهي حصوله على لقب أمير الشعراء
طبعا أنا مش بعلن عن المسابقة ولا حاجه أنا جاي اتكلم في حاجه أهم من المسابقة ، وهي إن في شاعر مصري تم اختياره من ضمن أول 35 على مستوى العالم العربي في مسابقة أمير الشعراء وطبعا الخمسة وتلاتين دول هاتبدأ بيهم المسابقة لحد ما يوصلوا في الآخر لخمس مراكز .. طبعا فخر لأي مصري ان شاعر من مصر يفوز في المسابقة دي ..
لكن احنا بقى دورنا فين ؟

دورنا بمنتهي البساطه في تصويت الجمهور ، لأن المسابقة فيها جزء للتحكيم وجزء لتصويت الجمهور ، والبرنامج هايتذاع ان شاء الله كل جمعة
الساعة :
21:45
على قناة :
أبو ظبي
برنامج أمير الشعراء

يعني يا ريت يا جماعة بالإضافة للدعاء شوية رسايل للراجل يدعموه وبلاش البخل ده .. على الأقل دي حاجه أهم بكتير من ستار أكاديمي والحاجات الهبلة اللي كانوا بيعملوها دي وبلاش بقى أنا معاك بقلبي ومعاك بمعنوياتي لا يا خويا انت وهو معنوياتك مش هاتعمل حاجه خالص
.

Friday, June 8, 2007

للمدخنين فقط









للمدخنين فقط

موضوع النهارده غريب شوية لكن هو مهم فعلا .. طب أبدأ إزاي بس في الموضوع ده .. المهم .. طبعا معظمكوا مفكر ان انا جاي اتكلم عن أضرار التدخين والمشاكل الصحية والكلام اللي لا يودي ولا يجيب ده .. انا مش جاي اتكلم عن ده خالص لاني اصلا بدخن ..
باختصار فكرة البوست ده جديدة وغريبة شوية لكن هي قايمة على أساس كل حاجه في الدنيا قايمة على أسس ومباديء .. مافيش حاجه اسمها كده وخلاص .. وكل حاجه لها فنون وإيتيكيت .. حتى الحاجات اللي الناس بتفكر انها في منتهى السهولة .. والبساطة .. بتبقى ظاهرها سهل لكن هي أصلا مش سهله ولا حاجه زي ما الناس مفكره .. المهم ان كل لعبة ولها قواعد .. حتى تدخين السجاير له قواعد وفنون وإيتيكيت ...
- إيه ده بجد ؟؟
- أيوه طبعا .. انتوا مفكرين انها سيبه واللا إيه ؟؟

وانا بصراحه بقالي فتره ملاحظ إن الموضوع بقى سيبه وكل من هب ودب بقى بيدخن وبصراحه الشباب الصغير اللي بيدخن ده بوظ الدنيا خالص ومابقوش يعرفوا أبسط قواعد وآداب التدخين
وانا بقى قلت لازم اعمل موضوع عن إيتيكيت التدخين .. بما إني ليا خبره في المجال ده ..
أولا ) عيب قوي لما يكون معاك ناس حوالي تلاته اربعة وانت بتدخن تروح تهف الدخان على اللي قدامك .. حركة بايخه جدا حتى لو كان اللي قدامك بيدخن .. ماتبقاش تهف الدخان .. يا إما تودي وشك شمال أو يمين وتهوفه .. يا إما لو حواليك ناس كتير ابقى هفه فوق .. يا إما ما تهفوش خالص سيبه يطلع لوحده .. وساعتها لو جه على حد هاتبقى انت مش قاصد .. شوفت بقى الموضوع سهل ازاي.

ثانيا) كتير من المدخنين بتبقى سنانهم وحشة جدا .. ولونها اصفر وتقرف شبه الكلب الجربان .. وتلاقي الواد كمان بيغسل سنانه تلات اربع مرات في اليوم وبرضه سنانه بايظة .. ويروح ينضفها عند دكتور السنان وتبقى زي الفل لكن مسافة شهر بالظبط بترجع زي الأول واوحش كمان .. إنتوا عارفين ده ليه ؟؟
أنا كنت كده .. وعرفت ليه سناني بتبقى صفرا مع اني كنت بغسل سناني بالمعجون كتير قوي ... لحد ما قابلت واحد صاحبي دكتور سنان .. وبيدخن سجاير .. وسنانة بيضا جدا .. على طول توقعت انه بينضفها بحكم انه دكتور سنان يعني .. بس حبيت أتأكد سألته .. قلت له طبعا انت على طول بتنضف سنانك ؟؟ قال لي لا خالص .. بس بغسلها بالمعجون مرتين في اليوم .. الصبح وبالليل .. انا فكرت انه بيشتغلني .. فقلت له يا سلااام معجون بس ؟؟ ومرتين بس في اليوم وسنانك بيضا كده ازاي ؟؟ قال لي يا بني الموضوع مالوش علاقة لا بمعجون ولا بتنضيف ولا طب ولا كلام فارغ من ده .. قلت له امال ايه ؟؟
تخيلوا إيه ؟؟
قال لي : يا ناصح لما تبقى تدخن السيجاره ماتاخدش الدخان على سنانك
انا طبعا رديت عليه قلت له ما باخدوش على سناني
قال لي : يبقى انت بتخرجه من بؤك
قلت له أيوه .. قال لي لا انت تخرجه من مناخيرك .. يا إما تضغط شفايفك على سنانك بحيث شفايفك تغطي سنانك من بره وتخرج النفس .. كده سنانك مش هاتصفر خالص

ثالثا ) لازم تمسك السيجارة في إيدك الشمال بما إنها من الخبائث .. يعني ماتبقاش ماسكها في إيدك اليمين وييجي حد يسلم عليك وتقوم انت مسلم عليه وإيدك فيها السيجاره عيب قوي يعني .. واللا يا سلام بقى لو بنت اللي جايه تسلم عليك هاتسيب إيدها معلقة وحضرتك بتنقل السيجاره من اليمين للشمال .. هايبقى منظرك ومنظرها غبي جدا وماعادتش هاتتكلم معاك تاني أصلا .

رابعا ) لما تبقى تدخن ما تبقاش تحط السيجاره في نص شفايفك .. شبه ماتكون بتدخن شيشة مش سجاير .. ابقى خدها على طرف شفايفك لا إما اليمين أو الشمال أي حاجه المهم ما تبقاش لا في النص قوي ولا ع الطرف قوي . أصل بجد بيبقى منظر غبي جدا .

خامسا) إوعى تدخن في الأماكن المغلقة ( لما يكون فيها ناس كتير بس) لكن لو فيه ناس قليله .. اتنين تلاته مثلا .. وانت شايف ان مش سيجارتك اللي هاتجيب لهم انشكاح في العمود المرتاح يعني ابقى دخنها يا سيدي لو حازقاك قوي .. بس ما تستحلاهاش يعني .

سادسا) في أماكن ما ينفعش تدخن فيها خالص .. زي وسائل المواصلات مثلا .. خصوصا التاكسيات .. واللا يا سلام لو انت راكب في الكنبة اللي ورا السواق .. وهو ما بيدخنش وانت روحت مدخن .. هايبقى مخنوق منك جدا .. على فكره بقى كمان عيب قوي انك تدخن وانت راكب ورا حتى لو كان السواق بيدخن .

سابعا) تخيل نفسك لو انت راكب تاكسي وخرمان على الاخر .. خلاص بقى مش قادر تستحمل المشوار يعني .. ونفسك تدخن .. ساعتها تبقى تقعد قدام جنب السواق .. وماتقعدش ورا .. وتطلع علبة السجاير بتاعتك وزي الأمور كده قبل ما السواق يلحق يتكلم تروح عازم عليه ... لا إما يدخن لا إما يطلع ما بيدخنش .. لو دخنها يبقى كويس جدا .. وهاتضمن انه مش هايقول لك التدخين ممنوع .. أو مش هايقول لك طفيها .. طب تخيل ان السواق طلع ما بيدخنش .. ولو ان انا مستبعد دي لان سواقين التاكسي من اللي بيشوفوه ياعيني ممكن يشربوا أي حاجه .. المهم لو طلع ما بيدخنش .. تروح انت مدخن السيجارة بتاعتك عادي جدا ... لو حسيت انه عادي يبقى عادي .. لكن لو حسيت انه بدأ يكح وهايقرفك .. على طول قبل ما يقول لك طفى السيجارة تقول له الدخان بيضايقك ؟؟ أطفى السيجارة ؟؟
طبعا هايتحرج يقول لك طفيها .. أكيد في ناس ما عندهاش دم وممكن يقول لك طفى السيجارة برغم كل اللي فات ده .. طبعا لو بعد كل ده وقال لك ايوه طفيها على طول تروح مكلمه في أضرار التدخين وانك أصلا عاوز تبطل من زمان لكن ظروف الحياة بقى والمشاكل وفلسطين وأفغانستان وسلم لي ع الترماي ... وطبعا في وسط كل الحوارات دي هو هايتعاطف معاك ويشجعك انك تبطل وهاينسي انه كان بيقول لك طفى السيجارة ، بعد كل ده لو قال لك طفيها برضه .. أكيد هاتكون السيجاره خلصت أصلا ..

ثامنا) لو دخلت مكان عام محطوط فيه لوحة مكتوب عليها ( ممنوع التدخين) ، في الحالة دي لو عاوز تدخن دخن عادي .. هاتسألوني ليه؟؟ اقول لكوا انا ليه ؟
لان فيه قانون بيمنع التدخين في الأماكن العامة .. واللافتة دي محطوطه عشان كده بس مش عشان في ناس بتتضايق من التدخين ولا حاجه والمصريين معظمهم بيخالف القانون أصلا






لكن خلى بالك من حاجه مهمه جدا أحيانا لوحة ممنوع التدخين دي بتبقى مكتوبه بخط الإيد .. في الحالة دي إوعى تدخن .. لان واضح ان واحد هو اللي كاتبها .. وبما إنه هو اللي كاتبها بإيده يعني دي بناء على اقتراح شخصي مش من مال الحكومة يعني .. يعني الراجل ده بيتضايق من التدخين .. ولو شافك بتدخن على طول هايدخل يردحلك ويفرج عليك حضارة السبع تلاف سنه .. لان حضرته كاتب لافته مكتوب عليها ممنوع التدخين .. وحضرتك ما بتشوفش .. ومثال للشاب المستهتر اللي مش هامه حد ...

تاسعا) طبعا لجان الامتحان بيبقى ممنوع فيها التدخين غالباً .. لكن أحيانا بيسمحوا بالتدخين في بعض الامتحانات .. زي امتحانات الدراسات العليا والدبلومات .. طبعا لو انت قاعد في لجنه وسمحوا بالتدخين في الامتحان إوعى تدخن لان بيبقى عيب جدا يعني .. لكن لو انت ما بتدخنش حاول تستغل الفرصه وتاخد أي سيجاره من اللي جنبك وتولعها وتهوف الدخان في اللي حواليك عشان مايعرفوش يحلوا ..

عاشرا) ده بقى آخر حاجه أنا هاتكلم فيها وأهم حاجه .. في ناس كتير بتدخن لكن لو حد معين عرف انهم بيدخنوا هاتبقى مشكله .. ما اقصدش الأهل .. لو انت اتحطيت في موقف زي ده وحد عزيز عليك شافك وانت في ايدك سيجاره .. إوعى تعمل الحركه الغبية وترمي السيجارة من إيدك .. لانه شافك بيها وكده عرف انك رميتها إعرف على طول انك كده سقطت أكتر في نظرة لانك أصلا خايف تواجهه بيها .. ومحرج وانت ماسكها .. يعني مش بتعمل ذنب بس .. ده انت كمان ما لكش شخصية .. لا ما ترميهاش ولا حاجه .. وسلم عليه عادي .. بس الفرق انك ما تخدش من السيجاره نفس وهو معاك .. إحتراما له بس مش أكتر . واتكلم معاه عادي جدا .. مش هاتموت يعني ولا حاجه .
اما بقى لو والدك هو اللي شافك وفي إيدك سيجاره .. برضه ما ترميهاش هي هاتقع لوحدها ..
اخر حاجه انا نسيت اقولها لكوا .. لما تبقى مروح البيت واهلك ما يعرفوش ان انت بتدخن .. ما تبقاش تستخدم معطر فم عشان ريحة الدخان .. ولا تاخد نعناع .. لانهم هايعرفوا انك بتستخدم معطر فم ومعنى كده انك بتدخن... ابقى قول لهم انك بتدخن احسن .. ابوك هايتخنق منك شوية ولما يلاقيك مصمم على موقفك هايشجعك هو بعدين .. ومش بعيد يعترف لك انه بيشرب حشيش واللا حاجه وبدل ما تدخنوا مع بعض تحششوا مع بعض



ده بالنسبة لإيتيكيت التدخين للجنس الخشن .. أما بقى الجنس الناعم فده مشكلة المشاكل ... طبعا صعب اكتبه هنا في نفس البوست لاني طولت قوي .. لو انتوا عاوزينه استنوا مني بوست تاني عن الموضوع ده ..

Thursday, May 31, 2007

أنا اتخرجت


أنا اتخرجتْ ..
وصار العرض زي الطول ..
وقضّيت الحياة بالطول ..
وتقديري كمان مقبول ..
أنا اتخرجتْ ..
وع القهوة نهاية البختْ ..
بدون تقدير ..
ولو كان فيه
ما كلُّهْ من زمان عند العرب بطيخ ..

شهادتي فْ جيبي زي الفل
ختم النسر نورها
وفوق نصه :
" تقر إدارة الكلية أن الطالب المذكور تخرج
من ... حدانا لعند بيت السيد الوالد "
أنا اتبهدلت ..
ورجليَّه من اللف الكتير دابوا ..
نصيحة لكل خريج السنه دي واللي فاتت
واللي داق الهم من راسه لكعابه ..
- إذا كان فاتك الميري ماتتمرمغش في ترابه
..
****
سقطت ..
يقولوا مش عاجب
نجحت ..
وبرضه مش عاجب ؟؟
ياريتني فضلت زي زمان
مقضيها ..
ولسه الاسم كان
"طالب"

أنا اتخرجتْ ..
وإيه تاني يا ناس فاضلْ ..
ما انا اتسميت خلاص
عاطلْ ..

هاعفن ..
لو فضلت شوية من غير شغل
وصرح من زمان مصدر
ماهوش مسئول
وقال ان احنا هانعين
وإن العاطلين زيي من القهوة هايتلموا ..
ومصدر تاني بيأكد
بإن الأمر بيهمه ..
يا فندم لحظة من فضلك ..
على أمك .. على أمه ..

Monday, May 14, 2007

يقطع رمزي هو وبحثه


يقطع رمزي هو وبحثه
طبعا انا عارف ان انتوا ما تعرفوش مين رمزي ده ، وأكيد كلكوا الوقتي بتقولوا إيه الواد ده ، يعني هو جاي هنا يحكي عن صاحبه ، بس يا جماعه فعلا رمزي ده عمل لي كالو ( الكالو : هو كل ما ينشأ في الرجل من حاجات معفنة ) لول .. إيه الهبل ده .. المهم .. باختصار رمزي ده واحد صاحبي .. الموضوع بقى إيه ؟
طبعا بما إن انا ورمزي في دبلوم القانون العام في كلية حقوق المنصورة . كان لازم انا اللي اكتب البحث بتاع رمزي واطبعه له . عشان احنا اصحاب بقى والحاجات الجامدة دي ، ويا ريتني ما كتبته ، أول ما أخدت منه البحث بتاعه حصلت لي كمية مشاكل عمرها ما حصلت في تاريخ البشرية المعذبة ( كل ده عشان بحث ) أيوه كل ده عشان بحث .. تخيلوا عمر حد فيكوا شاف قبل كده طابعة كمبيوتر (ليزر ) بتحشر ورق ، مع إن الطابعة دي لسه جايه من أقل من أربع شهور ، والله حصل مع بحث رمزي ، طبعا أول ما ده حصل أنا قلت بس الواد ده نحس والبحث ده انا مش هاخلص منه غير يا إما أولع فيه يا إما أولع في رمزي ، المهم انا فوتت الموضوع وكأن ولا أي حاجه حصلت وقلت خليك متفائل يا واد يا درش عشان التشاؤم ده حاجه مش كويسه خالص ، أه والله مش كويس خالص التشاؤم ، وبعدين انا طول عمري متفائل أساسا ، لحد ما حسيت ان انا ممكن اموت وانا مش واخد بالي .. المهم ما علينا .. بعد ما طبعت البحث .. فوجئت ان أرقام الصفح ما طلعتش .. مع إني والله مرقمها على الوورد . انا قلت لا بقي .. ده ما كانش بحث .. والله ما انا طابعه تاني .. وهاطبعه تاني ليه ده اكتر من 100 ورقة أطبعهم تاني عشان شوية أرقام .. مستحيل طبعا .. ( مش بخل والله بس زي ما تقولوا كده استعجال ) المهم رقمت الورق كله بإيدي .. لا لا لا قبل ما ارقم الورق حصلت حاجه غبية جدا .. ماسك الورق في إيد وكباية الشاي في إيد .. وإذ بالورق يسقط من يدي على حين غرة ( إيه رأيكوا في غرة دي ؟؟ ) طبعا ولعت .. إيه اللي بيحصل ده .. تخيلوا فضلت أكتر من ساعة أرتب في الورق عشان ارقمه .. المهم رقمته والحمد لله .. تخيوا كنت ساعتها لسه متفائل ... اه والله كنت لسه متفائل .
المهم كل ده عادي جدا ... طبعت الورق .. ونزلت عشان اوديه للمذكور رمزي .. حلوه المذكور دي .. بتفكرني بالإقرارات اللي بنشوفها في ورق القضايا .. ألفاظ تخنق .. المهم نزلت قابلت رمزي وعطيت له البحث ... وطبعا حقه انه يقلب في البحث ويشوف في أخطاء واللا لأ ... تخيلوا لقى إيه ؟؟
انا عاوزكوا تفكروا شوية
والنبي فكروا لقى إيه
هههههههههه
أنا مش مصدق إن الدنيا ممكن يحصل فيها كده
انتوا عارفين الأبحاث بيبقى فيها حاجه اسمها مراجع اللي هي في االوورد اسمها ( حواشي سفلية ) عارفينها ؟؟
أكيد معظمكوا عارفها يعني اللي هي بتبقى في اخر الصفحة دي
تخيلوا المراجع دي تلات ارباعها طالع في أول الصفحة .... وحياة ربنا حصل .. عمرها ما بتحصل في التاريخ ... يعني إيه مرجع يطلع في أول الصفحة .. على أساس ان الوورد ده كائن هلامي عبيط يعني واللا إيه ؟؟
واللا الوورد ده شبه الحكومة بتاعتنا يعني وبيضحك علينا ؟؟ طب على الأقل الحكومة بتضحك على الشعب كله
إنما الوورد كده بيستهبلني انا لوحدي
المهم اكتشفت في الاخر سبب الغلطه دي ، والحمد لله ما كانتش مني انا .. انا نسيت اقول لكوا ان كان في واحد صاحبي بيكتب معايا البحث ده ... والناصح ربنا يحميه لشبابه ( بدون ذكر أسماء عشان السمعة يعني ) كان مرقم المراجع بإيده ... يعني مش عاملها تلقائي .. فطبعا كل ما انا انسق حاجه ترتيب الصفح يتغير وحجم الصفحة يتغير فالمراجع تنزل شوية وشوية لحد ما تطلع في أول الصفحة اللي بعدها ، طبعا لو كان هو عاملها تلقائي كان وفر عليا كتير جدا ... وما كانش ده كله حصل ... المهم .. كل ده وانا عادي جدا .. وبصراحه الواد رمزي بعد كل ده صعب عليا .. ما هو برضه الواد ما عملش حاجه يعني عشان يطلع له بحث مراجعه في أول الصفح .. ( انا والله مش قادر امسك نفسي من الضحك كل ما افتكر منظر المراجع في الصفحه كان عامل ازاي ) .. طبعا أخدت منه البحث وروحت نسقته من جديد وطبعته تاني .. وعملت له فهرس جديد .. تخيلوا طبعا كل ده وانا عندي امتحااااااااااااااااااناااااااااااااااااااااااااااااات ومش فاضي .. طول عمري كده .. شمعة تحترق من أجل الآخرين ... يللا بقي انا مش عاوز اتكلم عن نفسي عشان انا مش مغروووووووووووووووووور خاااااااااااااااااااااااااالص .
المهم طبعت البحث تاني والحمد لله ما طلعش في الأخطاء اللي فاتت دي .. بس هل ده معناه ان ما حصلش مشاكل ؟؟ لا لا لا لا لا لا لا
مش بحث رمزي اللي يطلع كده من غير مشاكل ... ماهو لازم يعكنن عليا .. ما يبقاش رمزي .. أخدت الورق زي الشاطر وروحت وديتهوله وقال لي بص يا درش انت هاتاخد البحث ده توديه انت للدكتور عشان انا رايح الجيش ( انا ما قلتلكوش ان رمزي في الجيش أساسا ) وطبعا ما ينفعش اقول له لا .. يعني لما اقول له لا في وقت زي ده هاقف جنبه امتى ... أصله لو ما سلمش البحث في خلال أسبوع بيسقط في البحث وطبعا انتوا عارفين ان الدبلومات مافيش فيها حاجه اسمها واحد يشيل ماده .. يعني يا إما يسقط يا إما ينجح .. يعني لو شال ماده واحده هايسقط في الدبلومه كلها ... وطبعا ده مش حلو خالص ...خدت البحث طبعا وروحت زي الشاطر أكعبه .. تخيلوا ايه اللي حصل وانا ماشي في الشارع ... العصفوره
العصفووووووووووووووره
حتى العصفورة يا رمزي مش عاجبها البحث بتاعك
العصفوره عملتها على البحث
يا ربنا
هو في كده
طبعا ولا في دماغي .. يا كش يولع
وخدته وروحت اكعبه
بقي في سؤال أخير .. هو ينفع مكنة تكعيب تعطل وهي بتكعب ورق؟؟
انا عمري ما شفتها غير وانا بكعب بحث البني ادم الهلامي اللي اسمه رمزي
تخيلوا الراجل فضل يكعب البحث على إيده ؟؟
والله صعب عليا
المهم الراجل طول ما هو بيكعب البحث وهو حاسس بالذنب انه عطلني ... انا كان نفسي اقول له والله المشكله ما هي فيك انت .. بس ما رضيتش لا يفكر ان انا اللي نحس واللا حاجه .
المهم ان الراجل سايب الألوان كلها وعامل لي غلاف احمر
أحمر يا راجل ؟؟
هي ناقصه
طبعا كان لازم اقول لرمزي بعد كل ده
حمرا يا رمزي
وما حدش يفهمني غلط
أنا قصدي على جلدة البحث
جلدة البحث حمرا يا رمزي
حمرااااااااااااااااااااااااااااااااااااااااااااااااااااا

Wednesday, January 31, 2007

العالم دي هبلة واللا انا اللي أهبل ؟؟


باختصار بعد السلامات و الترحيب و الكلام الكتير ده انا هادخل في الموضوع على طول .. فاكرين البني ادم اللي اسمه صدام حسين .. بيقولوا باين هو ده كان رئيس لبلد اسمها العراق باين ؟؟ حاجه زي كده يعني .. المهم ..طبعا معظمكوا الوقتي بيقول ايه الواد العبيط ده اللي جاي يحكي في موضوع قديم .. وبرضه هاتقولوا يا عم الدنيا كلها عرفت انه اتعدم وخلاص مات انت جاي تقول ايه ؟؟
انا بقى جاي اقول لكوا الجديد
يعني من الاخر
يعني حطها على بطنا تنور
حطها على ضهرها تنور
يعني لا بنشحت ولا بنقول لله
يعني الكلام على ميه بيضه
... إحم .. إحم
إيه اللي انا بقوله ده
وقال ايه .. مش هاطول .. على فكره انا اهبل قوي
المهم ندخل في الموضوع
بعد موضوع اعدام صدام .. انا بصراحه الموضوع ما يهمنيش في حاجه ولا كان فارق معايا خالص .. بس الأزمة كانت في حاجه واحده .... هو سؤال انا سألته لنفسي ياترى أترحم عليه ؟؟ واللا ادعي عليه ؟؟
السؤال ده كان صعب جدا لكن توصلت لنتيجه مهمه جدا
هي انه كان راجل زفت ولا هو شهيد ولا نيلة ابــن الــ ... إحم ...كفاية كده .. بس برضه مش أمريكا اللي تعدمه
مش دي المشكله برضه اللي هارشالي نفوخي
طب يا عم انجز المشكله فين
ايه انتوا هاتضربوني واللا ايه والله هاقول اهوه
المشكله ان الراجل ده بعد ما مات وانا نازل على ايميلي كمية رسائل عجيبه أولها مشهد الاعدام اللي اتبعت لي حوالي خمسين مره وكل مره بمسحه ... بعد كده شوية مقالات وكلام فارغ شبه العيال اللي بيطلعوا في التلفزيون دول على قنوات الأخبار والكلام ده .. لحد ماوقعت عيني على إيميل غبي جدا الإيميل ده كان بيقول .. قال ايه ؟؟ ... خير اللهم ما اجعله خير إن صدام ما ماتش .. كل ده كلام جرايد
وان صدام بفكاكته كان عامل تلاته شبهه
والواد اللي مات ده اسمه ميخائيل ما اعرفش ايه كده ( ما اعرفش ايه ده مش اسم ابوه ) وان قال ايه يا اخويا صدام ضحك على أمريكا والدنيا كلها أغبيا ومش فاهمين الحقيقة ... والوحيد اللي فاهمها هو الأهبل اللي قال الكلام ده
طبعا الكلام مش منطقى خالص ..بس اللي يضحّك أكتر بقى ان انا اكتشفت ان الموضوع ده انتشر جدا ... لدرجة ان في واحد ( من الناس الهبلة دي ) استغل ان اعدام صدام ده موضوع الساعة وراح منزل كتاب وبيشرح فيه كيف ان هو توصل إلى السر الذي لم يكتشفه العالم كله ... التاريخ يا بيه . التارررررررررررييييييييييخ
كما يجب أن يكون
وقال ايه كمان ... إنه جايب أدلة قوية وبراهين دامغة ( إيه رأيكوا في دامغة دي أنفع ؟؟) الحجج دي ان صدام أيام المحاكمة كان له شامه تحت ودنه وزمان مالووووووووووووووووووووووش ....الواد ده عبيط
طب حتى لو كلامه صح ... هو يعني صدام لو هايعمل له شبيه مش هاياخد باله من الشامه دي ويعمل له عملية تجميل ويشيلها ؟؟
وبرضه الراجل رد على السؤال ده وقال لااااااااااااا ... ما اهو أصل صدام بيعمل حاجه للتاريخ وعاوز يسيب حاجه وراه الناس تفتكره بيها ... والحاجه دي ايه يا اخويا ؟؟ .... ركز معايا امال ما احنا قلنا الشاااااااااااامة اللي تحت ودنه ( شبه الأفلام العربي القديمة )
المهم اللي انا عاوز اوصل له .. انا فعلا مش فاهم العرب ولاد الوسخه الأغبيا بيعملوا ليه كده .. والله العرب دول بهايم .. يعني والله فعلا أحسن ناس تألف حواديت وكلام فارغ...
معلش انا دوشتكوا بس انا اتخنقت جدا من الموضوع ده .. وبعدين يعني ما يموت صدام واللا يولع ويروح في ستين داهية هو يعني الدنيا هاتقف على وفاته يعني زي ما يكون صدام ده عمر بن الخطاب واللا حاجه ؟؟
استغفر الله العظيم
أمال لو ماكنش فيه اعتقلات ولا كلام من ده كان حصل ايه
بني ادم جبااااااااااااااااااان مستخبي زي الفار في الجحر
وعاملينه بطل
بس اللي مدايقني فعلا .. إن الواد اللي عمل الكتاب ده كده تقريبا بقى مليونير لأن كتابه بقى تقريباً أكتر مبيعات السنه دي .. يعني واحد بقى مليونير بسبب شوية كلام فارغ وشعب بيحب يقرأ الكلام الفارغ
عرفتوا ليه بقى انا مسمى المدونة دي هــــرتــلـة
(صورة واحد مطلع لسانه )

Thursday, January 25, 2007

البحر ما بيكلمش حد



هاتصدقي لو قلت لِك
كان نفسي اريَّح راسي فوق صدرك
واعيط واترمي فْ حضنك
وانـــــــــام ؟!
فعلاً غبي
وانا مش هاقول لك ليه غبي
أصل انتِ عارفه
ان اللي شافك بسمه في الليل الكئيب
لازم يكون إنسان غبي
وان اللي يشطب أي حلم
عشان يكون فـ عيونك انتي المركبه
إنسان غبي
علشان بحبك زي عيل فـ ابتدائي
وأي نظرة من عيونك تقتله
فيقول فـ أشعار الصبايا
والعيون المليانين طيبه وشجن
ويقوم يقول لك
وببساطه
ممكن اتكلم معاكي؟؟
لو سمحتي
ممكن افرد غربتي
قدام عيونك واتسجن؟
بس انتي فكرتي اللي قال الكلمتين
إنسان ضعيف
وماتعرفيش ان الضعيف
هو اللي كسَّر ألف سد عشان يقول الكلمتين
البحر زي ما كان زمان
رافض يلم الموج ويسمع غنوتي
يا بحر ليه موجك عنيد
الحزن عمره ما كان كئيب
الحزن موجه عايزَه توصل للشطوط
فمتسجنوش
ولو اني برضه بعشقك
علشان ماشفتش موجه بتبص لوره
لكني ليه عتاب بسيط
بيقولوا إن البحر مليان بالهموم
ويحب يسمع أي شكوى
حتى لو كات من غريب
مع إني مش شايفك كده
أنا حاسس ان الموج غضب
وان انت كاره أي إحساس بالغضب
علشان كده بتحب ترمي الموج بعيد
وعشان كده
أنا لما جيت أشكي الهموم
فكرتني موجه
ورحت عملت سد
أتاريك ما بتكلمش حد

شعر / مصطفى حسان