قولوا ورايا .. الوزير قال إيه ؟
ركزوا معايا عشان الموضوع مهم .. مهم قوي .. مهم خالص
عارفين الوزير الفنان ؟! أيوه أيوه الراجل اللي بيجيب لوح وبيشخبط عليها ده .. أيوه أيوه هو اللي مابيعرفش يرسم حتى معزه ..
من غير ما اطول عليكوا .. كان في نائب من الإخوان بيتهم فاروق حسني في مجلس الشعب انه مع سياسة التطبيع وان المكتبات مليئة بالكتب والروايات الإسرائيلية .. فطبعا السيد الأستاذ الوزير الفنان استشاط غضباً (حلوه استشاط دي؟!) أيوه يعني ازاي الراجل يتهمه في وطنيته يعني؟! إحنا كلنا عارفين ان فاروق وطنيته حلوه يعني وبنت حلال، أيوه ياجدعان انتوا مستغربين ليه .. الراجل بيشتري كل يوم اتنين كيلو وطنيه من السوبر ماركت اللي جنب مجلس الشعب، المهم بدون إطالة لما الوزير زعل رد على النائب ده وقال له إيه ؟
قال له .. مافيش كتب اسرائيلية عندنا .. ولو في هاتهالي وانا احرقها قدامك عشان
تستريح
ركزوا في الجملة دي لأنها مهمه .. تاني عشان نحفظ يا جماعه وقولوا ورايا .. الفنان قال إيه ؟! قال إيه ؟! قال لك ان مافيش في مصر كتب اسرائيلية .. ولو كان في هو هايحرقها .. هايعمل إيه ؟! هايحرقها ...
خلاص كده .. اتفقنا ان الوزير هايحرق الكتب ؟!
تمام
بعد ما الكلام ده حصل .. موقف فاروق بقى بايخ جداً طبعا لانه مترشح لرئاسة اليونسكو ولازم يرضي اخواننا البعدا .. لا مش اخواننا خالص البعدا بس .. وبدأت بعض الجهات والمنظمات الاسرائيلية تشن حمله عليه بسبب الكلام اللي قاله ده .. بالإضافة إلى إن وزارة الخارجية الإسرائيلية قدمت احتجاج شديد اللهجة لسفير مصر في إسرائيل بسبب الكلام اللي قاله فاروق (ده على كلام يديعوت أحرونوت)
عمل إيه بقي الوزير ... أيوه هايكون عمل إيه يعني .. قال عكس الجمله اللي فاتت اللي بالاحمر دي ..
قال لوكالة فرانس برس انه ماقالش خالص خالص انه ممكن يحرق الكتب الاسرائيلية، وان الناس الوحشين بيشنوا عليه حمله وكل دي افتراءات وأكاذيب، وانه مش ممكن يقول كده خالص ده بالعكس الراجل كمان قال انه مستعد يترجم كتب من العبري للعربي ..
تاني يا جماعه الوزير قال إيه ؟!
قال ان مافيش كتب ولو في هايحرقها
قال إيه تاني ؟!
قال إن في كتب وانه مش هايحرقها
أبوك قال لامك ايه ؟!
قال لها أمريكا بتستهبل يا فوزية
وامك قالت لابوك إيه ؟!
قالت له خلينا في موضوعنا وقول لي فاروق قال إيه ؟!
