أخبار

Thursday, March 13, 2008

الرغيف أبو شلن




شوفتوا الريس يا جماله يا جماله .. يا حلاوه يا ولاد .. قال إيه الريس قال لنظيف يا واد يا

نظيف شوفلي الشعب زعلان من إيه في موضوع العيش ده واعمل لي تقرير يومي عن أزمة الخبز عشان نحل المشكلة .. خلاص يا جماعه ما تقلقوش الريس حل المشكلة وهايتدخل بنفسه .. يا منظمات حقوق الإنسان مش عاوزين منكوا عيش من أبو بريزة .. الريس بنفسه هايجيب لنا عيش من أبو شلن .. وسخن موحوح كمان .. بس الفرق ان العيش بتاع الريس مش هاناكله .. احنا هانقعد عليه وهو سخن
وربنا يا جدعان الناس دي بتشتغل نفسها .. يعني إيه لما تطلب تقارير يومية عن أزمة الخبز .. هو انت لسه هاتدرس .. يعني الناس بتموت كل يوم وانت لسه جاي تطلب تقارير .. وبعدين انا مش فاهم أصلا يعني ايه عاوز تقارير .. يعني الناس دي بتضحك عليك مثلا .. واللا احنا بنشحت منك واللا ايه .. واللا نكونش بنشحت منك .. لا لا قول بقي اننا بنشحت

منك .. يا راجل ده الاربع ارغفه بقوا بجنيه .. انت عاوز ايه اكتر من كده ..


هو ليه الريس ماعادش زي زمان .. ماتبصوش كده مش قصدي .. عارف انه كان وحش زمان ودلوقتي .. لكن زمان كان بيهونها شوية علينا بكلمتين حمضانين .. لكن دلوقتي مافيش تنفيذ برضه ومافيش كلام كمان .. يعني من الاخر على رأي المثل: عشمتني بالحلق .. ما يحدفش الناس بالطوب .. أيوه أمال إيه
ماهو الموضوع حاجه من اتنين .. يا إما الريس ما يعرفش أي حاجه في أي اتجاه و بس نايم على السرير بيتفرج على سبيس تون ... إيه ده إزاي يعني ريس بيتفرج على سبيس تون .. هو ينفع ؟؟
يا إما الريس عارف كل حاجه بس خلاص فقد النطق فعشان كده ما بيطلعش في أي حوارات علشان يطمن الشعب زي زمان .. وربنا ما طالبين منك تعمل فيها سبع البرمبه .. بس على الأقل اعمل زي محمد صبحي في تخاريف واطلع قول .. شعبي الحبيب المهاود ... ححححححححححححححححححح ... واحنا هانصدق ان ده صوت تصقيف .. انما انت ما بتطلعش أصلاً
لا واللي زاد الطينه بله بقي .. إن نظيف بعد ده كله طالع يقول إيه ؟؟ قا ل إيه ان فعلا في أزمه في العيش .. يا راااااااجل ؟


لا لا ما تقولش .. دي إشاعات يا راجل مش حقيقة .. دي قلة مندسه هي اللي بتلفق الأكاذيب دي ... قال أزمة قال ..
غير كده وكده بقي إنه بذكاء أهله لما نزل بني سويف .. بيقول ان السبب في طوابير العيش مش الأزمة ولا حاجه يا جماعه لا لا لا ... الأزمة بقي ان مواعيد العمل بتاعة المخابز بتبقي قليلة والصبح بدري فعشان كده في اقتتال في الطوابير (حلوه اقتتال دي؟؟ ) .. والحكومة بتحاول جاهدة إنها تحل أزمة الطوابير .. يعني من الاخر الحكومة بتقول ... الشعب يموت من الجوع عادي مش مشكله لكن ما يموتش من الطوابير .. ليه بقي ؟؟ عشان حكومتنا ما بتتكشفش على طوابير . انا شكلي هاتشل لوحدي ... خلاص مش قادر .. يا مرارتي يا انا

9 comments:

YHYيــوســف الـمصـرى said...

السلام عليكم يا درش
الله يخرب بيت عقلك انت بتشتم الريس ؟ يا اخى عيب عليك ده قد جدك ايه يعنى رغيف العيش بقى بربع جنيه ولا حتى بجنيه عادى جدا مفيش اى مشكله
عن الناس ما طفحت عيش
وعنها ما كلت خالص
ايه يعنى الناس بتموت فى طوابير العيش وبيتخنقوا وبيضربوا بعض علشان الرغيف عادى برضه شعب غير حضارى ومترباش
ايه يعنى يا اخى لما نولع بجاز مفيش اى مشكلة اهم حاجة صحه سعدته وراحة سعدته وراحة العائلة الكريمة ..بس السؤال الى بيطرح وبيمرمغ نفسه هو ريس بياكل حتى العيش من ابو ربع جنيه ولا مقضيها فينو ؟ بيقولوا ان ساركوزى بيبعتلوا كل يوم قفص عيش فرنساوى فى طيارة خاصة
لنا الله يا عم الحج
وحسبنا الله ونعم الوكيل
مش فى سعدته لاء حاش وماش فى الشعب المفترى الى بيستخصر يشترى رغيف العيش بربع جنيه ...
وبطل شتيمة حبيب الكل
عيييييييييييب
تحياتى

rona said...

انا عيزه عرف مين مين الناس اللى بطلع الإشاعات المغرضه دى دى اكيد مؤامره لتدمير مصر بيحولوا يشعلوا الفتنه بي الشعب لا والله عيب وبعدين صحيح محنا لازم نطلع من تحت البلاطه ونأكل كمان فى الاكل بنستخسر ياحول الله شعب مفترى وبعدين الله يخربيت اللى يكره الريس والله يخربيت اللى بيحبه وهو جواه بيكرهه والله يخربيت للى بيحبه وهو جواه بيحبه وواحد واقف جمبيه بيكره
لنننننننننننننننننننننا الله

Abo 7anf said...

مهو المشكله ان احنا مش فهمبن التقدم
والحريه الامبراليه التوسعيه المهلبيه اللى احنا عيشين فيها
أو أقلك احنا الفراعنه بتنمرد على الرغيف ابو شلن اللى مليان مسامير
مالها المسامير
دا حتى شعبنا عنده انميا نقص الحديد
والرغيف ابو ربع ما له عمره مبيشبع
علشان الشعب غصب عينه يعمل رجيم
ينهار دنا مش فاهم
مش بقلك شعب مش فاهم

موناليزا said...

أحييك على طرحك هذا الموضوع وبهذا الاسلوب
انت بتتكلم عن لسان الشعب وانا هعمللك توكيل وهلم توكيلات برضه عشان تتكلم فى الموضوع ده هو يعنى هانى رمزى فى فيلم عايز حقى احسن منك
بس تفتكر كلامنا ده هيجيب نتيجة انا متهيألى ممكن يلغوا العيش اللى هيجيبلهم الكلام ده
تقبل مرورى

مصطفى حسان said...

يوسف المصري :

ايه يا باشا ده بنفسه جاي المدونة .. لا لا مش مصدق نفسي .. هو حد جاب سيرة الريس يا بني .. انا مش عارف انتوا ليه بتأولوا الكلام كده على مزاجكوا .. وبعدين هو الريس في حاجه تتعيب ده نسمه يا بني
انا قصدي على الريس حنتيرة .. اصله فتح فرن عيش جديد وفرن نظيف يعني ،قصدي الفرن نظيف يعني مش قصدي على حد معين
قال اشتم الريس قال انت اتجننت

مصطفى حسان said...

rona :

يا باشا مافيش أي مشاكل واحنا الحمد لله عايشين حياه زي الفل انما بس احنا اللي شعب نكدي حبتين

مصطفى حسان said...

أبو حنف :

شلن أو ربع مش هاتفرق ان شا الله حتى جنيه واكتر
طول ما في وزاره نظئيف جدا وخاليه من الكوليسترول .. يبقي عااااااادي

فاهمني

عاااااااااااادي

مصطفى حسان said...

موناليزا :

لا ما هو احنا لو قعدنا نقول كلامنا مش هايجيب نتيجة ونسكت وخلاص يبقي هانضطر نموت من القهر والغيظ
على الأقل خالص اهوي على مراوح قلبي اللي اتفشكلت من الخنقة
علي فكره لو كل واحد عمل اللي عليه كانت حاجات كتير قوي اتغيرت

mostafa rayan said...

في مشهد جميل قوي في فيلم مرجان عادل امام كان طالع في مجلش الشعب ومعاه رغيف كبير قوي وبيقول الرغيف دة بشلن ومافيش اي زحمة هي بس المشكلة ان الواد اللي بيشتري العيش بياكله وهومروح فلما بيروح لأمه من غير العيش بيقولها الفرن كان زحمة
المشكلة يادرش مش في الحكومة دي بتعمل جاهدة علي حل ازمات المواطن وتحقيق اكبر قدر من الرفاهية له المشكلة
في الواد اللي بيشتري العيش
اطمن شكلنا كلنا كدة هنتشل