خطاب غير رسمي إلى السيد الرئيس

معلش اعذرني في اللي هاقولهولك ده
بس انا حقي اتكلم زي ما انا عاوز
انت برضه بتتكلم زي ما نت عاوز
وبقالك 27 سنه وماحدش قال لك حاجه
طول عمرك بتقول واحنا بنسمع .. بتخطب واحنا بنسقف .. بتقرر واحنا بنوافق .. معلش بقي يعني اسمع ولو لمره واحده في حياتك ..
صحيح كلامي ده ممكن يكون بالنسبه لك مالوش أي أهمية .. وأكيد بالنسبه لناس كتير كمان .. لكن متهيألي ان أبسط حق من حقوق أي بني آدم انه يقول رأيه حتى لو كان مايهمش حد ..
ثم ان انا كمان ماتفرقش معايا اذا كنت كويس واللي حواليك وحشين واللا انتوا الاتنين وحشين .. وبرضه ما يفرقش معايا اذا كنت ناجح فعلا بالأغلبيه واللا بالتزوير .. عارف ليه ؟؟
لأني أصلاً ما نزلتش انتخبتك ..
تقول عليا سلبي بقي .. تقول زي ما تقول مش فارقه كتير .. بس انا مش عاوزك .. وحقيقي ما بحبكش
عارف ليه ؟!
مش هاقول لك بقي ارتفاع الأسعار وأزمة العيش ولحم الحمير والكلام الكتير ده .. انا بس هاقول لك حاجه واحده ...
عشان انت مش صريح مع نفسك ..
اعترف انك فشلت في اصلاح النظام الاقتصادي للبلد
واعترف كمان انك فشلت على الأقل انك تنيم الناس شبعانه
أيوه في ناس بتموت من الجوع
بس انت اللي ما تعرفش
صحيح مولود في كفر مصيلحه .. وزينا يعني .. آسف .. كنت زينا .. لكن طبائع البشر بتتغير عادي يعني
فاكر أول ما مسكت الرئاسة قلت ايه ؟!
قلت انك مش هاتمسك غير فترتين بس
ليه غيرت رأيك .. صحيح انك قلت وقتها إلا إذا الناس هي اللي اختارتني .. بس انت عارف ان الناس ما اختارتكش ولا حاجه ..
(ان كنت تدري فتلك مصيبة .. وإن كنت لا تدري فالمصيبة أعظم)
عارف ليه في ناس كتير ما بتحبكش ؟!
لأنك مش شبهنا .. ما بتتكلمش زينا .. وخطاباتك كلها بلا استثناء غريبه وبتلف وبتدور طول عمرك .. ومفكر انك أذكى من الناس كلها ..
في قاعدة مهمه جداً كنا بنتعلمها زمان في المدارس
(اذا كنت فاكر نفسك أذكي واحد .. فأكيد إنت الأغبى)
لما يبقى الأزهر والكنيسة على طول الخط واقفين معاك وبيساندوك يبقى ده ايه ؟
يعني لما تطلع فتوى من الأزهر تحرم الإضراب يبقي ده ايه ؟
هو انت مقتنع فعلا بالفتوى دي ؟
مع كامل احترامي للأزهر .. الإضراب لا يعد خروجاً على الحاكم .. ولا يعد تعطيلاً ولا تخريباً لمصالح الأمة .. ولو العالم الجليل اللي أصدر الفتوى تعب نفسه شوية وقرا البيان كان هايعرف ايه الفرق بين تعطيل مصالح الناس وبين إضراب 4 مايو ..
كل اللي كانوا عاوزين يعلموه .. انهم يقولولك احنا والله العظيم بنموت من الجوع
وربنا البلد خربانه بس انت مش واخد بالك
راجع حساباتك يا ريس
ماحدش قال تستقيل .. ولا حاجه .. ولا حد قال حرر فلسطين لوحدك
مطالبنا بسيطه .. جداً جداً .. أبسط مما تتخيل
على الأقل نحس بأمان .. وان البلد مش في ايد تلاته .. اربعة بيتحكموا فيها بمزاجهم واحنا الضحية
على الأقل لما ادخل قسم اتعامل على إني بني ادم
أتعامل على إني (بريء حتى تثبت إدانتي) مش (مدان حتى تثبت برائتي)
ده انت حتى ماأصدرتش بيان تدين فيه الدنمارك لما سبت النبي عليه الصلاة والسلام
ولما هولندا عملت الفيلم برضه ما قولتش أي حاجه
يعني ولا كأنك عايش معانا
هو انت مش من هنا برضه يعني واللا ايه ؟