قال "الفجر" قال .. دي ماحصّلتش آخر النهار

هو احنا ليه مصممين نهزأ نفسنا ؟!
يعني الدنمارك وهولندا وبعديها مااعرفش مين اللي عمل كتاب بيتوزع مجانا عشان بس هو كمان عنده كلمتين عاوز يبخهم عن الإسلام .. اشمعنى هو يعني ما كله بيبخ بمزاج أهله وماحدش بيقول له حاجه .. انما توصل لمرحلة ان احنا نهزأ نفسنا .. أهو ده اللي مش ممكن أبداً (مع الاعتذار للست)
بقي يعني هو كل واحد مسك قلم فكر نفسه ابو العريف ويقول أي كلام وخلاص في أي حته .. معلش كده يا جماعه قبل ما ادخل في الموضوع انا عاوز اقول حاجه مهمه .. دلوقتي انا لو جيت على المدونة دي وقعدت أتكلم في الطب مثلا وكأني أعظم دكتور عالمي وفضلت كده افتي واشرح في الأطباء واقول انهم مش بيفهموا والمفروض يعملوا إيه ومايعملوش إيه .. وانا أصلا خريج حقوق .. ينفع ؟!
أكيد لا .. بس مش دي الفكره .. الفكرة ان اللي هايحصل انكوا هاتلاقوا السيد الفاضل الدكتور المحترم بجد/ حمدي السيد نقيب الأطباء مطلع روحي ومش بعيد يدخلني السجن عشان انا بتكلم في اللي ماليش فيه وبسوء سمعة الأطباء وسمعة المهنه .. تمام كده ؟ تمام
طب دلوقتي بقي أنا لو جيت على المدونة دي برضه وكتبت أراء سيادتي الخاصه بالإسلام وعلماء المسلمين وكبار المفكرين والفقهاء وأساتذة الشريعة الإسلامية وفضلت اشرح فيهم وفضلت أفتي وأبخ أي حاجه في أي اتجاه .. في حاجه هاتحصل ؟!
ولا الهوا
ليه بقي ؟؟
هو ده السؤال
انا مش هاجاوب عليه لأني لو بدأت اتكلم في النقطه دي بس ممكن أفضل لبكره .. لكن انا عاوز اقول حاجه تانيه كمان .. كنت بسمع حوار للعالم الجليل (رحمه الله) الشيخ / الألباني .. والمذيع كان بيقول له : أنا رأيي .... فقاطعه الشيخ وقال له ما معناه .. إنت مين عشان تقول رأيك .. مع العلم ان المذيع كان يقصد يقول رأيه عشان الشيخ يقول له صح واللا غلط .. بس برضه ليه تقول رأيك انت مذيع يعني تسأل بس .. شوفتوا بقي رد الفعل وقتها كان عامل ازاي .. اتفرج بقي على الفضائيات الوقتي وشوف برضه نفس الموقف برد فعل مختلف تماما لا من غير رد فعل أصلا ..
لا ده انت ممكن تلاقي مذيع يتهيألك ان هو الضيف أصلا والراجل المحترم العالم اللي قاعد جنبه ده عادي كده يعني جاي وماشي تاني مش مشكله .. يعني مثلا المذيع اللي اسمه (أحمد عابدون) من كام يوم بيقول لأحد الشيوخ إزاي تقول ان الكحل للنساء حرام ... طب حد فيكوا بقى يقول المفروض ده يتقال له ايه ؟
الضيف اللي كان معاه قال له ده رأيي .. وبصراحه انا مش فاهم اللي اسمه عابدون ده حاشر نفسه ليه .. يعني انت المفروض مثلا تسأله أدلتك إيه .. أو أسانيدك .. انما مش تيجي انت تقول له أدلة إباحة الكحل للنساء عشان هو بقي يرد عليك .. وانت مين أصلا ؟
سيبكوا بقي من كل اللي فات ده لأن ده عادي وبيحصل كل يوم .. وبقي عادي لو لقيت مذيع غير اللي فات بيرد على تليفون في البرنامج ويفتي هو بدال الضيف كده في السريع يعني بدل ما يتعب الضيف اللي معاه .. المشكله بقي اللي حصلت .. جريدة الفجر .. عدد الاثنين 17/3 واحد صحفي عبقري فذ اسمه محمد الباز .. قال ايه سيادته شايف ان الشيوخ بيتجوزا كتير وده مضايق حضرته .. وان المفروض يعني ما يتجوزوش وماياخدوش فلوس كتير من الفضائيات وكل واحد منهم يلبس جلابيه مقطعة ويعيش راهب من غير جواز .. ليه يا عم الحاج ؟؟ أيوه امال ماهو شيخ بقي .. يعني ازاي يعني يتجوز .. وكمان تعدد زوجات .. يا نهار يا نهار .. ويعاشر زوجاته كده يعني وهو شيخ كده وله دقن ؟! ومعاه فلوس كتيره وغني .. هو ينفع يبقي في شيخ غني ؟؟ ... هو انا معلش عاوز أسأل سؤال .. هو اللي كاتب الموضوع ده عبيط لامؤاخذه ؟ ايه الكلام الاهبل اللي هو كاتبه ده ؟ وايه يعني لما شيخ يتجوز أربعه .. هو حرام واللا ايه ؟ وايه يعني لما ياخد فلوس كتير ويبقي مليونير كمان لا يا سيدي ملياردير .. هو احنا ليه بنقرن التقوى بالفقر .. على فكره يا جدعان الرسول ما كانش فقير ولا حاجه زي ما الناس متخيله .. وعلى فكره سيادة الصحفي العبقري ده ما يعرفش ان الرسول كان متجوز تسعه وهو رسول ونبي .. وعاوز الشيوخ ما يتجوزوش ... طب بالزمه ده ينفع .. لاوكمان بيتهم الشيخ / محمد حسين يعقوب انه بيبوظ الشباب .. طب ده نقول له ايه بقى ؟!
على فكره عشان ما حدش يفهم كلامي غلط .. انا ما بقولش ان الناس دي منزهه ومالهومش أخطاء .. لا هم بشر وبيغلطوا عادي زي أي حد ويجوز توجيه الانتقاد لهم زي أي حد .. لكن النقد المنهجي المحترم .. مش انتقاد الأمور الشخصية بشكل فيه تطاول .. يصل أحيانا إلى التجريح .. وماينفعش أي حد مالوش في البطيخ ينتقد عالم من العلماء إلا إذا كان على نفس درجة علمه أو أعلى منه ... لكن واحد صحفي مافتحش كتاب فقه واحد يوجه انتقادات لأبرز علماء المسلمين على رأسهم الشيخ / محمد حسان ... ده ما ينفعش
بعدين انت مالك اذا كان متجوز واللا مش متجوز واللا متجوز واحده واللا اربعه .. ومالك انت اذا كان غني واللا فقير ؟ يا أخي الراجل معاه فلوس وزوجاته راضيين بالتعدد وهو قادر يعدل .. إيه اللي مزعلك انت ؟
لا ازاي بقى ده شيخ يا عم الحاج .. لازم يبقي فقير وماحلتوش اللضا .. ومش لاقي ياكل ...
على فكره واضح جدا ان الصحفي ده ماقراش في التاريخ الإسلامي إطلاقا ولا يعرف أي حاجه عن أهم الفقهاء في التاريخ الإسلامي .. وسيادته لو تعب نفسه ودور شوية هايكتشف ان الخلفاء في العصر العباسي كانوا بيغدقوا العطايا والمنح بشكل يكاد يقترب للبزخ على العلماء والفقهاء ... حد قالهم انتوا مبزرين ولازم تصرفوا الحاجات دي في حتت تانية وتسيبوا العلماء يشحتوا ؟ لا طبعا لأنهم علماء ولهم مكانتهم ولازم يحيوا حياة كريمه بدون منغصات .. وبعدين انت زعلان ان الشيخ خالد الجندي رد عليك وقال لك الرقاصه بتكسب بالملايين وماحدش قال لها حاجه .. ايه اللي مدايقك بقى في الكلام ده .. يعني رقاصه تاخد ملايين واللا شيخ عالم جليل .. لعيب كوره .. واسمه لعيب .. يعني بيلعب .. ياخد ملايين واللا عالم .. أبو تريكه نفسه لما كان في المطار كان بيقول للصحافيين يا جماعه على فكره في حاجات كتير أهم مننا .. عشان ما نخرجش برا الموضوع .. خلاصة الكلام ان في بعض المتسلقين سواء في الصحافه أو غيرها مفكرين انهم وهم بيكتبوا مواضيعهم انهم على ناصية الشارع بيتكلموا مع بياع الكبده واللا سواق الميكروباص .. وماعندهمش أي إحترام لأدنى قواعد الأدب في الكتابة .. الناس دي المفروض تحاسب على الكلام اللي بتكتبه بشكل عشوائي وهم مش فاهمين بيكتبوا إيه .