شوية كلام أهبل

ما اعرفش ليه حاسس اني عاوز اكتب بلخبطة وبدون ترتيب زي العيال اللي في ابتدائي لما بيحاولوا يكتبوا موضوع تعبير بيطلع في الاخر مليان شخبطه وكلام اهبل مش مترتب ومليان أخطاء إملائية وفي الآخر برضه المدرسة بتاعته تقول له شاطر يا حبيبي برافو عليك وتدي له "بنبونايه"

عاوز احس اني بتكلم كده وخلاص واخرج من موضوع وادخل في موضوع تاني بدون ما تحصل أي مشاكل واقول للعبيط " عمو عمو حضيتك عبيط " من غير لا مؤاخذة ... عاوز اتصرف زي العيل الصغير اللي بيكسل يروح الحمام فيفتح سوستة لا مؤاخذه البنطلون

ويعملها على أي حاجه حتى لو كانت صورة لرئيس الجمهورية

عاوز احضر ندوة لواحد سياسي كبير سواء حزب وطني أو معارضة وأشاور عليه وافضل اضحك لحد ما اتعب من الضحك واقول هو الراجل ده بيتكلم في ايه ؟
عاوز أقفش واحد حرامي رايح يسرق أي حد واقول له " عمو هو انت مش خايف تدخل الناي لما تموت "

عاوز أمسك واحد بيتكلم في العولمة والإمبريالية والراديكالية من قفاه وازعق له واقول له يعني إيه "ياديكالية" ويقول لي يعني رجعي يا حبيبي ، واقول له طب ما تقول " يجعي على طول وما تقيفناش"
عاوز اقول لكوا ان انا مش عارف بكتب الكلام ده ليه ومش عاوز حد يطلع يقول لي كلامك عميق وله دلالات لأنه مالوش أي حاجه في أي اتجاه غير شوية كلام اهبل
عاوز اقول انه أي حد مفكر نفسه عبقري فهو أكبر حمار في الدنيا
عاوز لما حد يسألني في حاجه ما اعرفهاش اقول له ما اعرفش
عاوز لما حد يسألني في حاجه انا متأكد منها أقول له مش متأكد
عاوز اقول اني ما بحبش أفلام يوسف شاهين لاني ما بفهمش تلات ارباعها لا ما بفهمهاش كلها
عاوز اقول ان الوزير فاروق حسني كل اللوح بتاعته زباله ومالهاش أي معني ولا تعبر إلا عن فنان فاشل
عاوز اقول للناس اللي بتقول الموسيقي لغة ، الموسيقي مش لغه لانها ما بتتفهمش ، الموسيقي بتتحس بس والإحساس أكبر من اللغة بكتير
عاوز أسأل أي واحد بيكتب في ما بعد الحداثة هو انت فاهم اللي انت بتقوله ده ؟؟ من غير ما يرد عليا يقول لي ما ينفعش أشرح قصيدتي عشان ما افضحهاش
عاوز اقول ان شعر القطة الشبحية بتاع الحداثة ده انا مش بفهم منه حااااااااااااااااجه
عاوز لما اغلط ما حدش يبص لي بقرف ويقول لي انت ضحل الثقافة
عاوز لما اروح ندوة واقول شعر والناس تسقف اقف واقول لهم انتوا بتسقفوا ليه .. انا ما بعرفش اقول قصيدة وحد بيسقف عشان بيلغوش عليا
عاوز اقول ان كلمات أيمن بهجت قمر ما بتعجبنيش
عاوز اقول ان أغنية العنب أغنية حلوه قوي ... لان لو محمد منير غناها الناس هاتسقف وهاتبقي حلوه برضه لان شفيقة قالت العنب والناس سقفوا وقالوا استلهام من التراث الشعبي وفيروز قالت العنب بس عشان فصحى وعشان هي فيروز الناس برضه سقفت لما قالت " هل جلست العصر مثلي بين جفنات العنب "
عاوز اقول ان نيوتن ده كان غبي لان مافيش حاجه اسمها جاذبية وأينشتين بعديه قال ما فيش حاجه اسمها جاذبية والناس مصدقة النظريتين .. ونيوتن نفسه قال في اخر حياته انا فعلا مش عارف يعني ايه جاذبية لان انا ما شفتهاش
أنا كمان مش مصدق نظرية الجاذبية
عاوز اعترض على كل حاجه الناس بتقول عليها حقائق لان كل واحد حقائقه مختلفه عن التاني ما عدا حقيقتين الموت وربنا
عاوز اقول ان الفلسطينين الأوائل هما اللي باعوا فلسطين لما باعوا بيوتهم لليهود عشان شوية فلوس وولادهم بيدفعوا التمن
عاوز اسأل عبد الحليم حافظ يعني ايه " أنا يسعدني تبعد عني وتجرب غيري في هواك " هو في عاشق يسعده الكلام ده ؟؟ أكيد لا لان العاشق بيكون أناني
عاوز اقول اني مابحبش اسمع وجيه عزيز لأن صوته وحش وبيعمل لي صداع
عاوز اقول اني ما بحبش شعر على سلامه لان كله مكسور ومافيهوش وزن ومالوش معنى
عاوز اقول ان قصيدة البتاع بتاعة احمد فؤاد نجم قصيدة زبالة
عاوز اقول ان أكل الشوكولاته كتير مضر بالصحه وشرب السجاير مضر بالصحه ليه السجاير لوحدها هي اللي حرام ؟
عاوز اقول ان مصطفى كامل ما عملش حاجه في حياته غير شوية كلام
وسعد زغلول كان أمارتي
وأحمد عرابي اتدبس في ثورة مش قدها وماكنتش ثورة أصلا لأن مافيش ثائر بيروح للحاكم ويطلب منه مطالبه ، الثائر بيروح يموت الحاكم
عاوز اقول ان ثورة 52 كانت انقلاب عسكري مش ثورة
عاوز اقول اني ما بحبش جمال عبد الناصر لانه كان بيشتغل الناس
عاوز اقول ان أنور السادات كان غبي عشان حبس كل التيارات " أمال انت مع مين يعني " وكان مغرور
عاوز اقول ان محمد نجيب اتضحك عليه
عاوز اقول ان مصر أيام الملكية كانت أحسن من دلوقتي

عاوز أقول ان احنا مش ولاد الفراعنة إحنا ولاد .. كــ

******************************

تحديث :

حرصا على مشاعر الساده مرتادي هذا المزنق قررنا نحن جهة أي حاجة في أي اتجاه حذف آخر حرفين من الكلمة الأخيرة والحدق يفهم

يعني زي ما الرقابة بتصفر على الكلام في برامج الهوا والناس برضه بتعرف الكلمة الخارجة كانت إيه أنا كمان حقي أقطع آخر حرفين والناس برضه تفهم

واللي مش عاجبه ما يدخلش هنا تاني

تحياتي لأي حد لسه بيدخل هنا بعد هذه الوصلة من الردح المتقطع