قد كده احنا مالناش لازمه ولا أهميه في الحياه
قد كده احنا شعوب ما فيش أي دولة في العالم تعمل لها أي حساب ، ولو حتى جدول الضرب ؟!
الدنمارك من أكتر من سنه نشرت الرسوم وبعدين أعادتها تاني وبعد كده هولندا عملت الفيلم الأخير اللي أكيد كلكوا سمعتوا عنه ، صحيح اشمعنه هي يعني ما احنا خلاص بقينا طيشة.. ناقص بس كل رئيس دولة ييجي زيارة لمصر ويشاور على الشعب ويقول لشعبه شايفين لو ما سمعتوش كلامي هاتبقوا زي الناس دي ، هو بجد في ايه ؟
ومن فترة برضه يطلع الراجل اللي عمل الفيلم ده اللي اسمه (جريت ويلدرز) يقول لو المسلمين عاوزين يدخلوا هولندا يحرقوا نص القرآن وبعدين يدخلوا ..
والمشكلة الأكبر انك لو جيت حسبتها صح هاتلاقي الناس انفعلت قوي لما طلع واحد من كام سنه سب السيدة عائشة في جريدة كويتية وبعدين الانفعال هدى لما واحد تاني سبها والصحابة كمان في جريدة الغد ، والانفعال هدى أكتر لما الرسول صلى الله عليه وسلم اتسب ، وبعد كده ربنا سبحانه وتعالى ... ومالقيتش أي رد فعل ... هو إيه اللي بيحصل ده ؟
وبعد كده لاحظت ان في ناس بدأت تستغل مواضيع الشتايم دي في انها تتشهر وتعمل نفسها أبطال على قفانا واللي يطلع يزعق شوية في التلفزيون ويقول ما ينفعش والحرية والديمقراطية والمساواة والعدل .. إيه اللي احنا بنعمله ده ؟!
طب وبعد كده ايه اللي حصل يعني ؟ عملتوا إيه انتوا بالبقين الحمضانين دول ؟
أنا عاوز أفهم بجد لما أمه دينها يتهان بالشكل ده ولسه مافيش أي تحرك ولا على الأقل خالص خالص يطلع السيد الرئيس في خطاب ويقول الكلام ده ما ينفعش .. وربنا ما بتتريأ ولا بهرج
وربنا يشهد على الكلام اللي بقوله ده لو طلع الريس وقال ماينفعش الكلام ده بس وربنا ما طالبين منك تحارب .. كل اللي طالبينه كلمه بجد ... والله لو قلتها الناس هاتحبك فعلا .. هو انت ليه متخيل ان العلاقة بين الحاكم والمحكوم بالشكل ده .. والله الشعب ده طيب وانت ممكن تكسب رضاه بأبسط الأشكال .. إنت عارف ( أنا اسف اني بكلمك كده) لو نزلت مره وسط الناس من غير حرس ماحدش هايحاول يقتلك .. عارف ليه ؟!
لأنك وقتها هاتبقي منهم ... لكن انت اللي عاوز تعيش مغيب عن المجتمع وعن نبض الناس فلازم تكون واحد تاني مش منهم .. ولازم تحس انك مكروه من الشعب حتى لو كل اللي حواليك أقنعوك انك قريب وان الناس بيحبوك .. فكر بجد .. وحاول تعمل حاجه .
ما اعرفش ليه حبيت أتكلم بالشكل ده .. جايز لأن ديننا أهم من أي حاجه في الحياة ... إنتوا عارفين أنا عجبني جدا د/مبروك عطيه لما كان في برنامج والمذيعه بتلمح له لذكريا بطرس وازاي نرد عليه .. وانه بيقول ان الإسلام فيه ملك يمين .. قال لها مانردش .. قالت له يعني إيه انت ماعندكش رد ؟ قال لها لا طبعا عندي إزاي يعني ما عنديش .. بس أرد ليه هو انا في محكمه .. أنا أفهم الناس مش أرد عليه هو ... لكن هو يتحرق مايلزمنيش في حاجه ..
عارفين عجبني رد الراجل ده ليه ؟! لأنه بجد واثق من نفسه ومن دينه
لكن بالنسبه لموضوع الدنمارك وهولندا ده الوضع مختلف .. العالم دي مسحت بكرامتنا الأرض .. لازم ناخد موقف بجد .. بجد أنا نفسي مع إني مش عارف الموقف ده ممكن يكون ازاي ... بس ممكن يبقي أي حاجه بسيطه مش لازم تحاربوا يا جدعان احنا مش طالبين مستحيل بس حسسونا إنكوا عايشين معانا يعني علماء الأزهر دول يقعدوا مع بعض يشوفوا هايعملوا إيه ويبعتوا عريضة لرئيس الجمهورية يقولوا احنا عاوزين كذا وكذا ..يعني مافيش حد طالب بأي حاجه في أم البلد دي غير القضاة وماعرفوش يعملوا حاجه برضه .. عارفين ليه ما عرفوش يعملوا حاجه ؟!
كان في واحد من المستشارين اللي كانوا منظمين الوقفه دي كان بيقول على فكره احنا مش أغبيا وكنا عارفين ان مطالبنا دي صعب تتحقق لكن كنا متخيلين ان الشعب هايقف معانا هو كمان لكن للاسف كانت الناس بتضرب كف بكف وتقول ربنا ينصركوا .. وده آخر اللي كانوا بيعملوه .. طب أيوه يعني وبعدين .. انتوا مش هاتعملوا حاجه؟!
معلش يا جماعه اعذروني على الانفعال ده .. بس بجد كده خلاص انا جبت اخري .. انا كل ما انزل الشارع والاقي الحياة ماشية زي ما هي ومافيش أي حاجه بتحصل بتخنق واللي يخنق أكتر انك تلاقي واحد فاتح جرنال في الكرسي اللي جنبك في الميكروباص وبيقرا خبر إعادة نشر الرسوم وبيضحك ببقي نفسى اسأله هو انت ليه ما بتعيطش .. هي الناس ليه ما عندهاش دم بالشكل ده
يعني الضرايب زادت قلنا عادي .. العيش غلا والأربعه بقو بجنيه قلنا ما يضرش .. سعر طن الحديد وصل 6000 قلنا ولا الهوا كلها أزمات وتعدي .. انما الصحابة يتشتموا والسيدة عائشة والرسول وديننا والقرآن .. لا بقي كده فعلا كتير .. على الأقل لما اقف قدام ربنا يوم القيامه ويسألني عملت ايه يومها أقول له إيه
انا مش عارف اقول له ايه فعلا ؟
مش هاينفع اقول له مش بإيدي .. لأ أنا في إيدي اعمل حاجات كتير بس مش عارف أعمل ولا أي حاجه
ومش هايكون عذر أبداً إني اقول الناس هي كمان ما عملتش
يوشك أن تداعى عليكم الأمم كما تداعى الأكلة إلى قصعتها .. صدقت يا حبيبي يا رسول الله
ولدت مبرئاً من كل عيب .. كأنك قد خلقت كما تشاءُ
