أخبار

Monday, May 14, 2007

يقطع رمزي هو وبحثه


يقطع رمزي هو وبحثه
طبعا انا عارف ان انتوا ما تعرفوش مين رمزي ده ، وأكيد كلكوا الوقتي بتقولوا إيه الواد ده ، يعني هو جاي هنا يحكي عن صاحبه ، بس يا جماعه فعلا رمزي ده عمل لي كالو ( الكالو : هو كل ما ينشأ في الرجل من حاجات معفنة ) لول .. إيه الهبل ده .. المهم .. باختصار رمزي ده واحد صاحبي .. الموضوع بقى إيه ؟
طبعا بما إن انا ورمزي في دبلوم القانون العام في كلية حقوق المنصورة . كان لازم انا اللي اكتب البحث بتاع رمزي واطبعه له . عشان احنا اصحاب بقى والحاجات الجامدة دي ، ويا ريتني ما كتبته ، أول ما أخدت منه البحث بتاعه حصلت لي كمية مشاكل عمرها ما حصلت في تاريخ البشرية المعذبة ( كل ده عشان بحث ) أيوه كل ده عشان بحث .. تخيلوا عمر حد فيكوا شاف قبل كده طابعة كمبيوتر (ليزر ) بتحشر ورق ، مع إن الطابعة دي لسه جايه من أقل من أربع شهور ، والله حصل مع بحث رمزي ، طبعا أول ما ده حصل أنا قلت بس الواد ده نحس والبحث ده انا مش هاخلص منه غير يا إما أولع فيه يا إما أولع في رمزي ، المهم انا فوتت الموضوع وكأن ولا أي حاجه حصلت وقلت خليك متفائل يا واد يا درش عشان التشاؤم ده حاجه مش كويسه خالص ، أه والله مش كويس خالص التشاؤم ، وبعدين انا طول عمري متفائل أساسا ، لحد ما حسيت ان انا ممكن اموت وانا مش واخد بالي .. المهم ما علينا .. بعد ما طبعت البحث .. فوجئت ان أرقام الصفح ما طلعتش .. مع إني والله مرقمها على الوورد . انا قلت لا بقي .. ده ما كانش بحث .. والله ما انا طابعه تاني .. وهاطبعه تاني ليه ده اكتر من 100 ورقة أطبعهم تاني عشان شوية أرقام .. مستحيل طبعا .. ( مش بخل والله بس زي ما تقولوا كده استعجال ) المهم رقمت الورق كله بإيدي .. لا لا لا قبل ما ارقم الورق حصلت حاجه غبية جدا .. ماسك الورق في إيد وكباية الشاي في إيد .. وإذ بالورق يسقط من يدي على حين غرة ( إيه رأيكوا في غرة دي ؟؟ ) طبعا ولعت .. إيه اللي بيحصل ده .. تخيلوا فضلت أكتر من ساعة أرتب في الورق عشان ارقمه .. المهم رقمته والحمد لله .. تخيوا كنت ساعتها لسه متفائل ... اه والله كنت لسه متفائل .
المهم كل ده عادي جدا ... طبعت الورق .. ونزلت عشان اوديه للمذكور رمزي .. حلوه المذكور دي .. بتفكرني بالإقرارات اللي بنشوفها في ورق القضايا .. ألفاظ تخنق .. المهم نزلت قابلت رمزي وعطيت له البحث ... وطبعا حقه انه يقلب في البحث ويشوف في أخطاء واللا لأ ... تخيلوا لقى إيه ؟؟
انا عاوزكوا تفكروا شوية
والنبي فكروا لقى إيه
هههههههههه
أنا مش مصدق إن الدنيا ممكن يحصل فيها كده
انتوا عارفين الأبحاث بيبقى فيها حاجه اسمها مراجع اللي هي في االوورد اسمها ( حواشي سفلية ) عارفينها ؟؟
أكيد معظمكوا عارفها يعني اللي هي بتبقى في اخر الصفحة دي
تخيلوا المراجع دي تلات ارباعها طالع في أول الصفحة .... وحياة ربنا حصل .. عمرها ما بتحصل في التاريخ ... يعني إيه مرجع يطلع في أول الصفحة .. على أساس ان الوورد ده كائن هلامي عبيط يعني واللا إيه ؟؟
واللا الوورد ده شبه الحكومة بتاعتنا يعني وبيضحك علينا ؟؟ طب على الأقل الحكومة بتضحك على الشعب كله
إنما الوورد كده بيستهبلني انا لوحدي
المهم اكتشفت في الاخر سبب الغلطه دي ، والحمد لله ما كانتش مني انا .. انا نسيت اقول لكوا ان كان في واحد صاحبي بيكتب معايا البحث ده ... والناصح ربنا يحميه لشبابه ( بدون ذكر أسماء عشان السمعة يعني ) كان مرقم المراجع بإيده ... يعني مش عاملها تلقائي .. فطبعا كل ما انا انسق حاجه ترتيب الصفح يتغير وحجم الصفحة يتغير فالمراجع تنزل شوية وشوية لحد ما تطلع في أول الصفحة اللي بعدها ، طبعا لو كان هو عاملها تلقائي كان وفر عليا كتير جدا ... وما كانش ده كله حصل ... المهم .. كل ده وانا عادي جدا .. وبصراحه الواد رمزي بعد كل ده صعب عليا .. ما هو برضه الواد ما عملش حاجه يعني عشان يطلع له بحث مراجعه في أول الصفح .. ( انا والله مش قادر امسك نفسي من الضحك كل ما افتكر منظر المراجع في الصفحه كان عامل ازاي ) .. طبعا أخدت منه البحث وروحت نسقته من جديد وطبعته تاني .. وعملت له فهرس جديد .. تخيلوا طبعا كل ده وانا عندي امتحااااااااااااااااااناااااااااااااااااااااااااااااات ومش فاضي .. طول عمري كده .. شمعة تحترق من أجل الآخرين ... يللا بقي انا مش عاوز اتكلم عن نفسي عشان انا مش مغروووووووووووووووووور خاااااااااااااااااااااااااالص .
المهم طبعت البحث تاني والحمد لله ما طلعش في الأخطاء اللي فاتت دي .. بس هل ده معناه ان ما حصلش مشاكل ؟؟ لا لا لا لا لا لا لا
مش بحث رمزي اللي يطلع كده من غير مشاكل ... ماهو لازم يعكنن عليا .. ما يبقاش رمزي .. أخدت الورق زي الشاطر وروحت وديتهوله وقال لي بص يا درش انت هاتاخد البحث ده توديه انت للدكتور عشان انا رايح الجيش ( انا ما قلتلكوش ان رمزي في الجيش أساسا ) وطبعا ما ينفعش اقول له لا .. يعني لما اقول له لا في وقت زي ده هاقف جنبه امتى ... أصله لو ما سلمش البحث في خلال أسبوع بيسقط في البحث وطبعا انتوا عارفين ان الدبلومات مافيش فيها حاجه اسمها واحد يشيل ماده .. يعني يا إما يسقط يا إما ينجح .. يعني لو شال ماده واحده هايسقط في الدبلومه كلها ... وطبعا ده مش حلو خالص ...خدت البحث طبعا وروحت زي الشاطر أكعبه .. تخيلوا ايه اللي حصل وانا ماشي في الشارع ... العصفوره
العصفووووووووووووووره
حتى العصفورة يا رمزي مش عاجبها البحث بتاعك
العصفوره عملتها على البحث
يا ربنا
هو في كده
طبعا ولا في دماغي .. يا كش يولع
وخدته وروحت اكعبه
بقي في سؤال أخير .. هو ينفع مكنة تكعيب تعطل وهي بتكعب ورق؟؟
انا عمري ما شفتها غير وانا بكعب بحث البني ادم الهلامي اللي اسمه رمزي
تخيلوا الراجل فضل يكعب البحث على إيده ؟؟
والله صعب عليا
المهم الراجل طول ما هو بيكعب البحث وهو حاسس بالذنب انه عطلني ... انا كان نفسي اقول له والله المشكله ما هي فيك انت .. بس ما رضيتش لا يفكر ان انا اللي نحس واللا حاجه .
المهم ان الراجل سايب الألوان كلها وعامل لي غلاف احمر
أحمر يا راجل ؟؟
هي ناقصه
طبعا كان لازم اقول لرمزي بعد كل ده
حمرا يا رمزي
وما حدش يفهمني غلط
أنا قصدي على جلدة البحث
جلدة البحث حمرا يا رمزي
حمرااااااااااااااااااااااااااااااااااااااااااااااااااااا

19 comments:

قلب يحترق said...

ضحكت من كل قلبي لما قريت البوست
بجد أسلوبك في كوميدي و سكر خالص
ههههههههههههههههههههه

طول عمري كده .. شمعة تحترق من أجل
الآخرين ... يللا بقي انا مش عاوز اتكلم عن نفسي عشان انا مش مغروووووووووووووووووور خاااااااااااااااااااااااااالص

يا خبر ابيض هم كل الناس اللي من المنصورة كدة
لو تعرف مدونة أخف دم أشرف توفيق بردو نفس خفة الدم و التواضع ده
ههههههههههههههههههههههههههه

وبعدين فكرتني بالنحس اللي نزلت عنه بوست قبل كدة في يوم خرجت فيه مع شاهي الانتيم بتاعتي 3 ساعات نستني المكنة بتاعه الايه تي ام تطلع لنا فلوس و بعيد عنك كنا خلاص هيجرالنا حاجة لأن مكنش معانا فلوس خااااااالص
وفضلت تعلق كل مرة نروح فيها

تصدق والله كسبت فيا ثواب انت مش متخيل الامتحانات عاملة في الواحد ايه
ربنا يخليك للناس المكتئبة اللي عندها امتحانات زيي

david santos said...

It places fhoto of Madeleine in your bloggue


Missing Madeleine!
Madeleine, MeCann was abduted from Praia da Luz, Portugal on 03/03/07.

If you have any information about her whereabouts, please contact Crimestoppers on 0800555111 Please Help

مصطفى حسان said...

dyin_soul :
هو أشرف توفيق ده طالع لي في كل حته .. ده انا بقيت اخاف اولع سيجارة لا يطلع لي منها .. كل ما اروح حته او اعمل أي حاجه أصل أشرف وأشرف .. ولعلمك بقي ؟؟
تعرفي ؟؟
ده أشرف
يا ربنا
هو في إيه ؟؟
أنا بقيت بحس ان أشرف هو اللي حرر سينا مش الساداات
على العموم طالما انتي بدأتي .. انا لازم أكشف المستور
انا قلت من الأول بلاش فضايح بس شكلي كده هاصطاد في المياه العكره

أشرف توفيق
أن أن أن أاااااااان
اللي انتي ما تعرفيهوش
إن أشرف
أن أن ااااااان

لا لا لا لا مش قادر أقول
مش قادر
لساني مش قادر ينطقها

أشرف هو اللي كان بيكتب معايا البحث

أنا قلت من الأول بلاش ذكر أسماء
بس يللا بقي ها اعمل ايه
ما هو تقريبا عملي اللي ربنا مسلطه عليا .. إدعي بس انه مايدخلش هنا ويقرأ الكلام ده
واللا يدخل هو احنا بنخاف
ده احنا اللي بنطلع القرش من بذر العنب

لول

Eman Eltaher said...

ايه ده يخرب عقلك !!!!!! لا لا لا مسخرة
ليه يا بابا كده ؟؟؟؟ سيحت للولد !!! و كل ده عشان بحث

ايه يعنى لما تطبعوه عروميت مرة و لا العصفورة تتنيل عليه !!! و لا لما يكون البحث من أول لأخره شؤم

لازم تكون متفائل برضه ... أنا بقيت متفائلة جدا بعد ما قريت موضوعك !!! لانه الأبحاث جاية و مشروع التخرج هيخلينى متفائلة أكتر و أكتر
تخيل بقى لو مثلا العصفورة و لا حتى البغبغان اتنيل على ورق مشروع التخرج او انه مثلا بعد ما طبعنا كتاب ورقه أكتر من 200 و عملنا منه 5 نسخ و ف الآخر نكتشف انه فيه حاجة غلط

صدقنى ساعتها هولع فيك
عشان انت خليتنى متفائلة زيادة عن الزوم

حراااااااااااااااام

و نصيحة ليك بلاااااش قرنعة !!! لول

حلوة قرنعة دى ؟؟؟؟؟؟؟؟؟

عالمى ازرق said...

ده ايه المن والاذى ده
ده الواحد ميفكرش يقصدك فى بحث خالص على كده
المهم رمزى سلم البحث ولا لأ
اصل بعد كل ده والبحث يكون دون المستوى تبقي وحشه فى حقك انت

الكلام نوعان :كلام فارغ وكلام مليان كلام فارغ said...

ياااااااااااااااااااااااااااااه حمدلله على السلامه كنت غايب فين المده دي
اكييييييييد كنت مشغول في بحث رمزي
ماشاء الله ده غلب شراره اللى كان بيطلع في التليفزيون
المهم ان البوست تحفه بس قولى ازاى كنت بتكعب البحث بعد اما العصفوره عملتها عليه؟

nour said...

هاهاهاهاهاهها
على فكرة انا حاسه بيك
انا الابحاث بتاعتى اللى بعملها فى الكليه بتبقى ضخمه جدا لانها كلها صور انا بنزل اصورها من الاحياء الاثرية و كده و افضل اطبع الصور و الكتابه و الزقها على ورق كانسون و اكعبها
كل ده و مبيحصبيش اللى حصل لبحث رمزى
هاهاههاهاها
مش عارفه اقولك ايه معلش

مصطفى حسان said...

eman eltaher
يعني إيه قرنعة ؟؟
ولو ان هي مفسره نفسها
تقرنع قرنعة فهو قرنوع وهي قرنوعة

إيه مختار الصحاح اللي انا فاتحه ده انا هاغير اسم البلوج ده واسميه نهاية اللظلاظ في أروش الألفاظ

إيه بس الكلام الغريب اللي انتوا بتقولوه ده ...

سيبك من ده كله ... المهم.. هي المشكلة فعلا ان انا متفائل .. وبرغم كل ده لسه متفائل تخيلي

طب بصي بقي انا هاحكي لك على موقف .. بصي الموقف ده انا متأكد ان التاريخ ما بيحصلش فيه كده .. وما رضيتش اكتبه في البوست عشان ماحدش يقول ان انا مزودها حبتين واللا حاجه

المهم الموقف ان أخينا كان رايح مكتبه عند واحد صاحبنا عشان يطبع له الغلاف .. اخر مره لان الطابعة بتاعتي مش فاكر ايه اللي كان حاصل فيها ما خلانيش اطبع له الغلاف ... المهم .. عنوان البحث إيه ؟؟
"حقوق وضمانات المتهم في مرحلة جمع الاستدلالات "
تخيلي الجملة كلها طالعه ما عدا حرف الــ ـهـ ـاء بتاعة المتهم

يعني بضميرك كده ... في بني ادم طبيعي بيحصل معاه كده
يعني إيه الجمله كلها تتطبع ماعدا حرف
طابعة عبيطة يعني واللا ايه ؟؟
وبعد ده كله بتقولي لي ابقي متفائل

ــــــــــــــــــــــ

عالمي أزرق

رمزي سلم البحث خلاص

ومتهيألي بعد الكلام اللي انا قلته لإيمي المفروض انك كده عرفت ان اللي انا بقوله ده أبسط حاجه ممكن تتقال
وبعدين أساسا رمزي بحثه مسرووووووووووووووق
ههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه

ــــــــــــــــــــــــ

الكلام نوعان : كلام فارغ وكلام مليان كلام فارغ

أنا كنت عقبال عندك بذاكر .. عشان امتحانات الدبلومة بتاعتي ولسه بذاكر عشان امتحاناتي 26/5 إدعي لي بقى .. انا هاخلص 9/6
بس ان شاء الله هاحاول ادخل كل فترة يعني

وبعدين شراره إيه بس ... انا متهيألي انهم واخدين شخصية شرارة دي من رمزي

ـــــــــــــــــــــــــ

nour

مش قادر أقول لك أكتر من إنها نوايا

كل واحد ونيته

يللا ربنا يسامحه بقى وينجحه

الوردة السوداء said...

يخرب بيتتتتتتتتتتتتك
ايه يابنى
هههههههههههههه
بجد مش قادرة

safa7_karmooz said...

ههههههههههههههه

ادى اخرة دراسة الحقوق

الا بس عاوز ااعرف حاجه

هوا انت بتكتب بالمواسم؟؟؟

david santos said...

Hello, darsh, Have a good day.

ضـوء الـقـمر said...

هههههههههههههههههههههههههههههههه
لا بجد ده كويس انك لسه متفائل
انا لو مكانك كنت رحت انتحرت من زمان ده الوضع كده صعب اوي
فعلا عندك حق (يقطع رمزي هو وبحثه) بس على فكرة بقة انا هروح اقول لرمزي انك بتقول عليه كده :P
ربنا معاك في الامتحانات :)

Mirage said...

لأ فعلا انت كتاباتاك دمها خفيف موووووووووووووووووووووووووووووووووت

سكينة said...

درش
أديك خدت درس من رمزي ده ويا رب العلامة متكونش هيا كمان حمرااااااااا
بالتوفيق في امتحاناتك يا رب وفي هرتلك الممتعة

Eman Eltaher said...

ههههههههههههه
ايه يعنى لما حرف يقع م الطابعة ف السكة ؟؟؟؟؟ أو لا لما أتشل معاك و مع السامعين ؟؟؟؟؟ عادى يعنى ما انا مكتوب عليا اتشل

و بعدين قرنعة دى من اختراعى ميتهيأليش هتلاقيها ف أى قاموس !!!!! هيا الأصل تقريبا قرعنة بس انا ساعات كتير بلغبط ف الكلمات و اقلبها سبحان الله

أنا هقولك مرة كنت عايزة أقول لواحدة انى حاسة انى هفرفر من الحر .. روحت قولتلها انا حاسة انى هفرفس من الحر

طبعا قعدت تبهدلنى و تقوللى ده على اساس انك خروف العيد و لا ايه ؟؟؟؟؟؟

و هكذا يعنى حاجات كتير حركنتيشى

حلوة حركنتيشى دى ؟؟؟؟؟؟؟؟؟؟؟

مصطفى حسان said...

الوردة السودا :

مش قادره إيه بس لا امسكي نفسك شوية لا حد ياخد باله واللا حاجه تبقى مشكلة

safa7_karmooz :

ماتفكرنيش بقى عشان دفعة التكملي اتلغت وعاوز اروح اولع في مرعي بتاع الكليمة ده .

لا انا مش بكتب مواسم ولا حاجه بس انا عندي امتحانات يوم 26/5 في الدبلومة اللي انا بعملها .. يعني السبت الجاي


david santos:

مين ازاي ليه
... مش عارف


I am fine


ضوء القمر :

بعد الشر عليكي من الانتحار ده انا اعملها بعدك يا قمر والله ولا يبقى ليا عيش في الدنيا دي ( طبعا أي كلام مجاملة ماتصدقييييييييييش )

وبعدين رمزي ده طيب خالص ... ده قرى الموضوع ده كمان .. عشان بس ما تعتقديش ان انا بنم عليه واللا حاجه


mirage :

ربنا يخليك يا جميل ده بس من زوقك


سكينه :

إلا انا عندي سؤال هو انتي اسمك سكينة بتاعة ريا دي واللا سكينة بتاعة المطبخ؟؟

ههههه

هو انا من ناحية اتعلمت فانا اتعلمت .. لكن إيه حمرا دي ؟؟
هو اللي بنعمله في الناس هايطلع علينا واللا إيه ؟

لا ده احنا اللي بهيظنا الفهايص وحشتكنا الحناكش

Eman Eltaher :

يا نهار مالوش ملامح يا جدعان وبيسألوا اللغة باظت من إيه ؟؟

واحدة بتقول قرنعة وأصلها قرعنه وكمان انتي اللي مخترعاها ؟؟

يا بنتي أصلها أرعن .. ده إسم .. جاي منها الرعونة .. أكيد عارفه الكلمة دي .. فصحىىىىىىىى

وانتي بنصاحتك حولتنيها لـ قرعن وما اعرفش ضفتي الهاء ليه ؟؟

وبعد كده اتلخبطتي فيها وقلتيها قرنعة

هههه إيه رأيك في درس اللغة الجامد ده .. والله يا بنتي انتي نسيتيني العربي أساسا

قال قرنعة قال

Anonymous said...

ههههههههههههههههههههههههههههه


موتنى من الضحك


اهو رمزى صحبك ده شبه استاذة بكلية اداب المنصورة

فقرية وحظها معايا ملخبط

يللا ربك يهونها على كل الدبلومات وتمهيدى الماجستيرات

مصطفى حسان said...

يا نرفانا هو احنا في ديك الساعة لما تضحكي ( إيه رأيك في ديك دي ؟)

انتي اداب المنصورة ؟؟
كلية اداب اساسا ملخبطة مع اي حد .... او هي الكلية نفسها اللي نحس كل ما ييجي عميد يشيلوه .. لا إما ماعرفش مزور لا إما رشوه .. هو والوكيل بتاع الكلية ... يا بنتي الكلية ريحتها فاحت من زمان


يللا اي خدمه

mostafa rayan said...

انا لو منك انفض لرمزي دة خالص