أخبار

Wednesday, January 31, 2007

العالم دي هبلة واللا انا اللي أهبل ؟؟


باختصار بعد السلامات و الترحيب و الكلام الكتير ده انا هادخل في الموضوع على طول .. فاكرين البني ادم اللي اسمه صدام حسين .. بيقولوا باين هو ده كان رئيس لبلد اسمها العراق باين ؟؟ حاجه زي كده يعني .. المهم ..طبعا معظمكوا الوقتي بيقول ايه الواد العبيط ده اللي جاي يحكي في موضوع قديم .. وبرضه هاتقولوا يا عم الدنيا كلها عرفت انه اتعدم وخلاص مات انت جاي تقول ايه ؟؟
انا بقى جاي اقول لكوا الجديد
يعني من الاخر
يعني حطها على بطنا تنور
حطها على ضهرها تنور
يعني لا بنشحت ولا بنقول لله
يعني الكلام على ميه بيضه
... إحم .. إحم
إيه اللي انا بقوله ده
وقال ايه .. مش هاطول .. على فكره انا اهبل قوي
المهم ندخل في الموضوع
بعد موضوع اعدام صدام .. انا بصراحه الموضوع ما يهمنيش في حاجه ولا كان فارق معايا خالص .. بس الأزمة كانت في حاجه واحده .... هو سؤال انا سألته لنفسي ياترى أترحم عليه ؟؟ واللا ادعي عليه ؟؟
السؤال ده كان صعب جدا لكن توصلت لنتيجه مهمه جدا
هي انه كان راجل زفت ولا هو شهيد ولا نيلة ابــن الــ ... إحم ...كفاية كده .. بس برضه مش أمريكا اللي تعدمه
مش دي المشكله برضه اللي هارشالي نفوخي
طب يا عم انجز المشكله فين
ايه انتوا هاتضربوني واللا ايه والله هاقول اهوه
المشكله ان الراجل ده بعد ما مات وانا نازل على ايميلي كمية رسائل عجيبه أولها مشهد الاعدام اللي اتبعت لي حوالي خمسين مره وكل مره بمسحه ... بعد كده شوية مقالات وكلام فارغ شبه العيال اللي بيطلعوا في التلفزيون دول على قنوات الأخبار والكلام ده .. لحد ماوقعت عيني على إيميل غبي جدا الإيميل ده كان بيقول .. قال ايه ؟؟ ... خير اللهم ما اجعله خير إن صدام ما ماتش .. كل ده كلام جرايد
وان صدام بفكاكته كان عامل تلاته شبهه
والواد اللي مات ده اسمه ميخائيل ما اعرفش ايه كده ( ما اعرفش ايه ده مش اسم ابوه ) وان قال ايه يا اخويا صدام ضحك على أمريكا والدنيا كلها أغبيا ومش فاهمين الحقيقة ... والوحيد اللي فاهمها هو الأهبل اللي قال الكلام ده
طبعا الكلام مش منطقى خالص ..بس اللي يضحّك أكتر بقى ان انا اكتشفت ان الموضوع ده انتشر جدا ... لدرجة ان في واحد ( من الناس الهبلة دي ) استغل ان اعدام صدام ده موضوع الساعة وراح منزل كتاب وبيشرح فيه كيف ان هو توصل إلى السر الذي لم يكتشفه العالم كله ... التاريخ يا بيه . التارررررررررررييييييييييخ
كما يجب أن يكون
وقال ايه كمان ... إنه جايب أدلة قوية وبراهين دامغة ( إيه رأيكوا في دامغة دي أنفع ؟؟) الحجج دي ان صدام أيام المحاكمة كان له شامه تحت ودنه وزمان مالووووووووووووووووووووووش ....الواد ده عبيط
طب حتى لو كلامه صح ... هو يعني صدام لو هايعمل له شبيه مش هاياخد باله من الشامه دي ويعمل له عملية تجميل ويشيلها ؟؟
وبرضه الراجل رد على السؤال ده وقال لااااااااااااا ... ما اهو أصل صدام بيعمل حاجه للتاريخ وعاوز يسيب حاجه وراه الناس تفتكره بيها ... والحاجه دي ايه يا اخويا ؟؟ .... ركز معايا امال ما احنا قلنا الشاااااااااااامة اللي تحت ودنه ( شبه الأفلام العربي القديمة )
المهم اللي انا عاوز اوصل له .. انا فعلا مش فاهم العرب ولاد الوسخه الأغبيا بيعملوا ليه كده .. والله العرب دول بهايم .. يعني والله فعلا أحسن ناس تألف حواديت وكلام فارغ...
معلش انا دوشتكوا بس انا اتخنقت جدا من الموضوع ده .. وبعدين يعني ما يموت صدام واللا يولع ويروح في ستين داهية هو يعني الدنيا هاتقف على وفاته يعني زي ما يكون صدام ده عمر بن الخطاب واللا حاجه ؟؟
استغفر الله العظيم
أمال لو ماكنش فيه اعتقلات ولا كلام من ده كان حصل ايه
بني ادم جبااااااااااااااااااان مستخبي زي الفار في الجحر
وعاملينه بطل
بس اللي مدايقني فعلا .. إن الواد اللي عمل الكتاب ده كده تقريبا بقى مليونير لأن كتابه بقى تقريباً أكتر مبيعات السنه دي .. يعني واحد بقى مليونير بسبب شوية كلام فارغ وشعب بيحب يقرأ الكلام الفارغ
عرفتوا ليه بقى انا مسمى المدونة دي هــــرتــلـة
(صورة واحد مطلع لسانه )

22 comments:

أخف دم said...

يا عم مصطفى.. هوه انا هفضل انا اللى أعلق فى ام البلوج ده لوحدى؟ ما تأجر خمسة ستة يعلقوا يابنى معاى.. عموما ..المشكلة يا صاصا انك جيت ع الراجل قوى .. أينعم هوه مش ملاك بس مش شيطان قوى يعنى كده..وكل البلاد العربية _وحط خط تحت كل دى_ بيحصل فيها أمر من اللى عمله صدام.. وثانيا انت بتقول طالع زى الفار.. يعنى واحد دولة كاملة بتدور عليه وعايزه يقف فى السنتر بتاع الجامعة ويقول أنا صدام أهوه ..
هيييييييه..
طبعا هيستخبى..
وافتكر الجمايل دى

كرانيش said...

بتسال
العالم دى هبله ولا انت اللى اهبل
والله انت ادرى ياأخ مصطفى
صوره واحد مطلع لسانه

الوردة السوداء said...

تصدق بقى
ان يوم صدام ماتعدم
انا شكيت انه مش هو
بس فعلا سواء كدة او كدة مش هيخسر
كله بيطلع فى الغسيل

Ahmad Hegab said...

على فكرة انت لاسع

البوست جامد

مصطفى حسان said...

أشرف توفيق / أو أحسن توفيق .. يعني زي ما انت بتقول دايما ان والدك مسميك كده عشان يشكر في نفسه :
والله انا حاولت أستأجر ناس ( حلوة استأجر دي ؟؟ ) عشان يردوا على البوستات بتاعتي . بس الظاهر الموتسيكل عدى لما كانت العجلة عند المبنى .. بص .. انت عارف العصارة اللي في اخر ش الجلاء ؟؟
ما تشربش منها عشان وحشة
والله ما انا فاهم أي حاجه

مصطفى حسان said...

كرانيش :
هو اللي انا متأكد منه ان الراجل اللي عمل الكتاب ده أذكى بني ادم في الليلة دي كلها لانه حسبها صح
يعني زي ما بيقولوا طلع القرش من بوء السبع
إيه بوء دي ؟؟
المهم انها جاية من بأ يبء فهو بئيء وهي بئيئة
وهذا بوء
أنا اهبل جدا على فكره انا كان ممكن اقول فم وخلاص
يللا بقى المشكلة في مدرسين العربي منهم لله نسوني الانجليزي خالص

مصطفى حسان said...

الوردة السودة :
كله بيطلع في الغسيل ؟؟
يعني إيه ؟؟
واللا ده على أساس ان القاضي بتاع المحاكمة كان الست أم عبده الغسالة اللي ساكنة على أول الشارع واللا ايه؟
يللا أي حاجه بقى كله بيطلع في الغسيل
ههههههههههههههه
اكتب اللي انا عاوزه
البلوج بتاعتي
لول

مصطفى حسان said...

ahmed_h :
انا لاسع ؟؟
تسدق أول مره اخد بالي ان انا فيا ملامح من سلك الكهربا
انا كده هاخاف اخبط في لمبه واللا حاجه لا تحصل بيننا علاقة غير مشروعة
يعني على اساس ان اللمبه دي أنثى

-_- said...

و اختبار ال
DNA
ده كان قريب صدام ولا ايه و مقالش للامريكان على انه ميخائيل مش صدام ؟

طبعا هو صدام

smraa alnil said...

انا مش هقولك وريني الكتاب
ولا اي حاجة انا هقولك خش علي اللينك دة

http://www.smt3.com/sdam/
تحياتي

مصطفى حسان said...

sharm :
من غير الـ BNA
الموضوع كله اساسا ما يدخلش الدماغ خالص
سمرا :
هو في حاكم عاقل في الدنيا هايعمل لنفسه دوبلير مع العلم ان ماحدش يعرف الدوبلير ده غير صدام والدوبلير نفسه .. لو ده صح .. ممكن يكون فيه احتمال ان الدوبلير يعمل انقلاب
لا من غير انقلاب
يروح يقتل صدام ولا من شاف ولا من دري ويحكم هو العراق
وماحدش يعرف أي حاجه
مش ده منطقى واللا ايه ؟

Anonymous said...

ما علينا من اي حاجة..
الطريقة جامدة اوي..:D
مشكلة :D

vision said...

اسلوبك لذيذ انا بكره الموضوع ده وزهقت من الكلاام فيه فعشان كده مش لااقيه كلاام اقولو مستنيه منك بوست تانى نقول فيهه احلى كلاام

Yasmine Adel Fouad said...

انا سمعت اشاعة ان صدام اللى اتعدم مش صدام الحكيكى :) بس ما سمعتش عن الكتاب الصراحه عموما المشكله انك عملت للكتاب دعايه و كده فى ناس هتشتريه و لو مش هتصدق هتضحك
لو عايز نصيحتى الغاليه
شوف صاحب الكتاب و خد منه نسبه من الارباح

ههههههههه

مصطفى حسان said...

ماراويتا :
طريقة ؟؟
انا بلعب بـ إتنين اتنين اربعة
ايه يا ماراويتا هو احنا بنلعب كورة

ميرو :
بصراحة انا كمان زهقت من الموضوع ومن الحكايات على صدام ده وعشان كده انا كاتب الموضوع ده

ياسمين :

لا بقى .. انا فكرت في أكتر من كده
فكرت ان انا كمان اعمل كتاب
واقعد أألف انا كمان اشمعني انا يعني .. واقول ان فيه شبيه لـ حـ .... لا لا لا ايه ده احنا هاندخل في السياسة واللا ايه ؟

Memo said...

شوف يا مصطفي انت متسكتش على نثسك انت لسه بدري يا ابني عليك من الزهايمر ده انا انصحك تعرض نفسك على مسؤل كبير
لااااااا متفهمنيش غلط
ده عشان يفهمك حكيكه الوضع
تحياتشييييييي

tearwhispers said...

شىء جميل لما الواحد يهرتل بدل ميتجنن
بس موضوع صدام ده كل الأزمة اللى عملها جوايا هو تحدى الاسلام يعنى اعدامه يوم العيد و كأن المسلمين كلهم ملهومش قيمة
غير كده هو نفسه يولع سواء أكان هو أو الدوبلير
بس يولع بايدنا احنا المسلمين يعنى
مش بايد شوية كلاب
انا طبعا قريت الموضوع متاخر
و واضح انك نسيت البلوج اصلا
انت فين يا ابنى كل ده ؟

مصطفى حسان said...

ازيكوا يا بشر
أنا بس داخل هنا عشان اقول لكوا ان انا لسه ما متتش ولا حاجه
انا بس عندي امتحانات قريب فعشان كده مش بدخل على النت خالص بقالي فتره
وشكرا لكل الناس اللي لسه فاكرين مدونتي
سلاااااااام
راجع لكوا تاني

Esmeralda said...

طيب يعنى الخلاصه هو لا مش هو؟؟؟؟؟؟

خيخيخيخخخخخخ

:)

مصطفى حسان said...

esmeralda

هو انا كاتب الموضوع ده كله عشان تيجي انتي تقولي لي هو واللا مش هو ؟؟

وبعدين انتي يا بنتي مالك انتي ومال العالم دي .. هما الغلطانين أساسا انهم ما خادوش رأيك في الموضوع ده قبل ما يشنقوه

مصطفى حسان said...

memo

طب انا راضي ضميرك
يعني واحدة بتقول " حكيكة " يبقى مين فينا اللي عنده زهايمر

مصطفى حسان said...

tearwhispers

هما تقريبا عاملوا صدام على إنه خروف
والعرب على إنهم شوية بهايم ( أسف على الأسلوب بس مش لاقي ألفاظ أرقى من كده)

انا والله موجود بس بعيد عنك عندي امتحانات .. ولو سقطت متهيألي ممكن امي تموت فيها .. فبدخل كل فتره