أخبار

Thursday, August 16, 2007

أنا مش فاهم حاجة

من حوالي يومين اتصل عليا واحد قال ايه خير اللهم ما اجعله خير ..
أنا المخرج / فلان الفلاني ... من قناة فواصل -
خير .. أي خدمة -
حضرتك الشاعر / مصطفى حسان؟ -
أيوة أنا -
احنا رشحنا حضرتك عشان تشارك في مسابقة قصيدة التحدي .. مسابقة في شعر العامية .. على مستوى الوطن العربي -
( طب إزاي في شعر العامية وعلى مستوى الوطن العربي ؟ يعني ازاي هاتقارن بين أكتر من لهجة بالإضافة إلى أن كل لهجة لها قواعدها المختلفة تماما )
وهايكون المركز الأول جايزته مليون ريال -
( أنا متهيألي مافيش مشكلة في موضوع اللهجات ده خااااالص .. أنا أصلا ممكن أكتب شعر خليجي عادي يعني )
المهم انا أخدت منه العنوان والميعاد وروحت .. وياريتني ما روجت .. لقيت شوية شعراء كتير قاعدين روحت قاعد معاهم .. ويعدين الشاعر الكبير قوي جدا خالص سيد حجاب .. وشوية ناس كتير من الخليج .. المهم المذيع الخليجي اللي مع سيد حجاب مالوش أي لازمة أصلا يا دوب يطلع يقول الان مع شاعر جديد والشاعر يعرف نفسه ويقول القصيدة يقوم المذيع يقول نسمع التعليق سيد حجاب يفضل ربع ساعة يتكلم عن القصيدة وبعد ما يخلص المذيع يقول بالتوفيق وخلاص على كده .
تخيلوا أحيانا كانوا بيخلوه يعيد كلمة بالتوفيق دي .. انا فعلا مش عارف ايه يعني مش عارف يقول كلمة .. ( بالتوفيق ) سهلة خالص ومافيهاش مشكلة ... ده غير المذيعة اللي اتنقطت منها كل شوية يقطعوا التصوير عشان تعيد نفس الجملة عادوا اكتر من خمس مرات عشان جملة واحده .. اللي هايجنني ان المخرج كل ما يوقفها يقول لها هايل بس معلش بس الجملة هاتقوليها بالطريقة الفلانية .. وماانفعلش عليها خالص .. متهيألي لو ممثل عندنا أو مذيع غلط الحجم ده من الأخطاء المخرج ممكن يخبطه بالكرسي اللي هو قاعد عليه .
المهم بدون ما اطول عليكوا بدأ التصوير .. انا كان دوري في التسجيل رقم 12 .. وكان بعدي 2 شعراء بس .. يعني تقريبا معظم الناس خلصت .. قلت القصيدة والحمد لله عديت المرحلة الأولى ...طب المرحلة التانية دي بقى إيه ؟؟
إن أي حد يجاوب عليا مافيش أبدا .. أنا قلت يا واد سيبك من المصريين لانهم دايما فاضحيننا ومش فاهمين حاجه وبيعملوا فيها أبو العريف .. اسأل الخليج بقى اللي هما المفروض أسرة القناة يعني .. اكتشفت إن هم أمر مننا .. الراجل فضل يقول لي كده كلام غريب مافهمتش منه حاجه خالص غير حاجه واحده بس ان المفروض الحلقة دي هاتتذاع على قناة فواصل وهو ما يعرفش امتى ..أمال مين اللي يعرف ؟؟
المفروض ان العشرة اللي اجتازوا المرجلة الاولى ( اللي انا منهم طبعا ) هاتتعرض الحلقة بتاعتهم قريب وفي واحد منهم بس أو اتنين هو اللي هايطلع دبي .. بناءا على درجات لجنة التحكيم وتصويت الجمهور 50% للتحكيم و 50 % لتصويت الجمهور .
طب انا راضي ضميركوا .. هو في مصري هايخلص رصيده على الشعر ؟؟
طب ابقى خلي الشعر ينفعك بقى
إوعوا تفتكروا ان الكلام اللي انا كاتبه ده عشان اقول لكوا صوتولي بقى واتبرع ولو بجنيه وتعاطفك لوحده مش كفاية والكلام ده .. لا لا اللي مهتم هايتفرج واللي مهتم أكتر هايصوت .. والاتنين مافيش فيهم حد سلبي .. لان أساسا في شعراء مش بيتابعوا المسابقات دي .. يبقى ازاي احنا هانطلب من جمهور عادي بيسمع عمرو دياب وتامر حسني ودينا انه يسمع شعر لا ويصوت كمان .. فجأة كده ؟؟ إزاي يعني ؟
سيبكوا من كل ده .. اللي هايجنني بجد العالم الخليج دول بيجيبوا جمهور الشعر ده كله منييييييييييييييييييييين ؟؟
يعني لو حد فيكوا اتفرج على أمير الشعراء وشوفتوا جمهور المسرح كان عامل ازي ؟؟ والناس بتشجع بجد زي ما تكون كورة مش شعر
واللا الناس اللي بتبعت رسايل في الشريط اللي في اخر الشاشة ده ... والتصويت من الجمهور ...
هل الموضوع فعلا له علاقة بالثقافة واللا كلها تجارة .. واذا كان كل ده تجارة .. طب الجمهور ده إيه ؟؟
هو مين فعلا بقى رائد الثقافة دلوقتي الخليج واللا إيه ؟؟
أنا ما عدتش فاهم أي حاجه
**************
تحديث :
معاد الحلقة يوم 6/9/2007
واللي مش هايصوت لي ما يدخلش هنا تاني
علشان انا ديمقراطي جدا
انتهى .......................................................................................

12 comments:

ضـوء الـقـمر said...

الف مبروك يا درش عقبال ما نشوفك شاعر كبير يارب بس انا بصراحة اول مرة اسمع عن قناة فواصل دي ؟؟؟
انا بصراحة شايفة ان في ناس كتير اوي بتهتم بالشعر بس ضايعين في وسط الناس اللي بتهتم بحاجات تانيه كتير وبالمسابقات دي بدأو اهم يظهرو شويه المهتمين بالشعر وهتلاقي بردو مصريين بيخلصو رصيدهم عالشعر :D
بس انا فعلا لفتت نظري ان كل اللهجات مختلفة في الوطن العربي يبقه فين وجه المقارنه ؟؟
تحياتي يا درش واتمنى ليك كل التوفيق والنجاح يارب

الكلام نوعان :كلام فارغ وكلام مليان كلام فارغ said...

الف مبروك وبجد وحشتنا اوى اوى
وبعدين انا كمان معرفش ايه قناه فواصل دي
دي قناه مغموره جدا ومحدش متابعها
اوعى تكون اشتغاله يا درش لان انت عندك حق في مساله اللهجات دي
تحياتى

مصطفى حسان said...

ضوء القمر :

الله يبارك فيكي يا جميل .. والله وانا كمان أول مره أسمع عن فواصل دي بس هي تقريبا قناة جديدة لو دورتي عليها هاتلاقيها

بحس كتير ان دول الخليج بتعمل ده تجاره واحيان تانيه بحس ان الكلام اللي بنقوله عليهم ده قصر ديل وان هم يستاهلوا فعلا لانهم وان كانوا قبل كده أقل مننا فهم الوقتي أحسن بكتير مننا

أما عن الناس اللي بدأت تظهر وبتهتم بالشعر فده حقيقي فعلا بدأت تظهر جماعات أدبية كتيره قوي ومنتديات وامسيات شعرية بينظمها شباب إذا كان في الساقية أو غيرها

وبدأت المواهب تظهر بشكل كبير

مصطفى حسان said...

الكلام نوعان :

نص كلامك حلو والباقي مش عاوز اقرأه

والله انتي اللي وحشتينا وكلكوا واحشينني جدا

وبعدين ما تعرفيش فواصل طب ما اناكمان ما اعرفهاش

ايه بقى ؟؟


هو المفروض ان انا اول ما اروح اروح الـ LBC
واللا ايه ؟؟

واحده واحده يا مشمش

وبعدين انتوا ليه بتتجاهلوا قدر الجايزة وبتركزوا في حاجات تانية مش مهمه خالص زي شهرة القناة وانا مالي ان شا الله ما حد عرفها ....


لا يا بندق دي مش اشتغاله

البرنامج هايبدأ في شهر رمضان ولو دورتي على القناة على النايل سات هاتلاقيها ان شاء الله
أما موضوع اختلاف اللهجات فده حقيقي
وانا مش فاهم ازاي هايكون التحكيم بصراحه بس كل اللي اقدر اقوله ان الموضوع بجد


تحياتي وشكرا على التعليق ابقي افتكرينا دايما كده

أخف دم said...

والله يابنى لك منى رسالة موبايل لما التصويت يبدأ .. وأنا عارف من غير مجاملة انك تستحق تفوز .. ربنا يوفقك
وانا مستنى البرنامج عشان أضيع عليك فلوس الرسالة

مصطفى حسان said...

أخف دم :

إنت بتشتغلني واللا إيه ؟؟

ده على أساس ان انا لوحدي في المسابقة وان انت مش معايا يعني واللا إيه ؟
أقول لك على حاجه أحسن

انا اصوت لك وانت تصوت لي ونعمل تبادل .. واعمل عنك بوست هنا وانت تعمل عني بوست عندك

( صورة واحد مطلع لسانه )

YHYيــوســف الـمصـرى said...

صباح الفل يا درش
يابنى كلنا معاك وانا اول واحد
انا معاك بقلبى وبرسايلى كمان تبدأ بس المسابقة وانا هظبطك هشحن كارت بمية وكله هصوت ليك بس لما تكسب الجايزة بالنص هههههههههه
واى حد اهعرفه هقرالو الشعر بتاعك وهخليه يصوت لما صوته يتنبح ههههههه
وانت عارفنى بقى القاءى فى الشعر بيبقى عامل ازاى ههههههههه
ربنا يوفقك يا درش انت شاعر جميل اوى وانسان اجمل وتستاهل كل خير ربنا معاك يا باشا
تحياتى

زى الهوا said...

سيبك من كل دا , ومبروك لك انك من العشرة وخصوصا لأنهم شكلهم كانوا كتيرررررررر اوى , دا شرف لحضرتك انه يتم اختيارك من ضمن كل الناس دى سواء كسبت بعد كدة او لأ ,

مصطفى حسان said...

يوسف :

مابلاش انت عشان خاطري تلقي الشعر

خلي أي حد تاني يا يوسف عشان انا عارف انت إلقائك حلو قوي .. وبعدين انا مش عاوز اتعبك يا يوسف


زي الهوا :

ربنا يبارك فيكي

بس مش عارف انا متهيألي ان الإنسان لازم لما يحلم يبقى حلمه كبير علشا لما يتحقق يبقى قريب من اللي حلم بيه

اصل الحلم مش بفلوس

فعشان كده انا حلمي ممكن يبقى بعيد قوي .. ولو ما اتحققش مش هازعل ولو اتحقق هافرح وهاكون عارف اني في يوم من الأيام حلمت بيه قبل كده وهاكون قدام نفسي شكلي احسن

Eman Eltaher said...

يااااااااااه
أغيب فترة عن البلوج أرجع الاقى مسابقات شعر
ده انا محظوظة على كده

طب و انا فين بقى ف المسابقة ؟؟؟؟
هههههههه
مش موجود اسمى هناك ؟؟؟
خسارة فيهم

هههههههههههه
هيلاقوا زي شعرى فين
عامى و فصحى و خليجى
و مشوى و مقلى

هيا فين القناة طيب
ترددها ايه حضرتك ؟؟
عشان أصوتلكم و الم الناس
ههههههههههههههه

الى الأمام
و بالتوفيق ليك و لأشرف توفيق

TaMeR said...

صبح صبح ...

من رأي يا درش ... سيبك من الشعر وخليك في الكوميديا.... او المحاماه .... الشعر يا بني ما بيأكلش عيش .... و احلم ... الحلم ما بيضرش ... المهم استمتع وعيش اللحظه في لحظتها .... ان لو كنت قلت اللي انت كتبه هنا ساعه تصويرك لـ قصيدتك .... اعتقد ان المشاهدين كانو وقعوا من الضحك وصوتو لك.... او عليك ...



تحياتي لاحسن شعب في الدنيا ....

TaMeR said...

جمدة مووووت ....

by the way ...
ايمان دي جمده موووت .....
شفت البروفيل بتاعها .... وللاسف انا تابعت قصيدة التحدي كلها بما اني شغال معاهم في نفس المجموعة الاعلامية .....

وما كنش فيه تواجد للقصيدة المصرية ....

احنا فعلا بنمتاز في كل المجالات ... بما اننا ٨٠ مليون واكيد هيطلع مننا ناس كويسه ....

لكن بنحب نقلد وخلاص ... مشين ورا اللي بنشوفه طالع موضه او جديد ....

لكن احنا ما بنجددش ولا بنحط بصمتنا في اي حاجه ....


انا شايف ان احنا شعب خفيف الظل .. ومن خفته ما بقاش فيه ظل خالص ...
ليه ماندخلش الكوميديا في الشعر .....

مش لازم تكون مسخره .. بس يبقى الشعر اللي يتناسب معانا كـ مصريين

وليه احنا ديما بنكتب عن الحريم والمزز وازاي حلقولنا.... والزمن الاسود والعزاب اللي احنا فيه ....

وبالنسبه لنقطة ان ما فيش مصريين بيتابعو الشعر ... اعتقد انك غلطان .... الاغاني هي عباره عن كلمه حلوه الواحد بيحس بيها .... اكتب انت واحنا نرقصلك ... قصدي نسأفلك



ونهارو ابيض