أخبار

Thursday, January 25, 2007

البحر ما بيكلمش حد



هاتصدقي لو قلت لِك
كان نفسي اريَّح راسي فوق صدرك
واعيط واترمي فْ حضنك
وانـــــــــام ؟!
فعلاً غبي
وانا مش هاقول لك ليه غبي
أصل انتِ عارفه
ان اللي شافك بسمه في الليل الكئيب
لازم يكون إنسان غبي
وان اللي يشطب أي حلم
عشان يكون فـ عيونك انتي المركبه
إنسان غبي
علشان بحبك زي عيل فـ ابتدائي
وأي نظرة من عيونك تقتله
فيقول فـ أشعار الصبايا
والعيون المليانين طيبه وشجن
ويقوم يقول لك
وببساطه
ممكن اتكلم معاكي؟؟
لو سمحتي
ممكن افرد غربتي
قدام عيونك واتسجن؟
بس انتي فكرتي اللي قال الكلمتين
إنسان ضعيف
وماتعرفيش ان الضعيف
هو اللي كسَّر ألف سد عشان يقول الكلمتين
البحر زي ما كان زمان
رافض يلم الموج ويسمع غنوتي
يا بحر ليه موجك عنيد
الحزن عمره ما كان كئيب
الحزن موجه عايزَه توصل للشطوط
فمتسجنوش
ولو اني برضه بعشقك
علشان ماشفتش موجه بتبص لوره
لكني ليه عتاب بسيط
بيقولوا إن البحر مليان بالهموم
ويحب يسمع أي شكوى
حتى لو كات من غريب
مع إني مش شايفك كده
أنا حاسس ان الموج غضب
وان انت كاره أي إحساس بالغضب
علشان كده بتحب ترمي الموج بعيد
وعشان كده
أنا لما جيت أشكي الهموم
فكرتني موجه
ورحت عملت سد
أتاريك ما بتكلمش حد

شعر / مصطفى حسان

10 comments:

Yasmine Adel Fouad said...

ايه ده
أول حاجه أقراها النهاردة
و بجد عليتلى دماغى جدا
كنت حاسه ان القصيدة موجه
بتشيلنى و تحطنى و انا سايبالها نفسى
بجد من أجمل الحاجات اللى قريتها من فترة طويله
انسيابية الأداء عندك حلوة اوى
ليا فقط ملحوظة واحدة

قدام عيونك

هى المفروض
قدام عينيك
علشان عينيك مضاف اليه
مش كده و للا انا نسيت النحو
سعيدة بمرورى من هنا

أخف دم said...

انت يا عم الحاج
القصيدة حلوة من الآخر..
ومش هنتكلم كتير فى صور وتعبيرات وكلام كبير مش فارق .. أهم حاجة القصيدة وصلانا زى الفل .. وفعلا إحساسها عالى جدا .. افتكر الجمايل دى..
وتعليق على أنا حرة:
يا ستى الدكتورة .. القصيدة عامية يا ست الكل.. يعنى مالهاش دعوة بالمضاف والمجرور والطالع روح أهله..
ماشى؟
وانتى برضه افتكرى الجمايل دى.

مصطفى حسان said...

انا حرة :
لا انتي مانسيتييش النحو ولا حاجه ..بس متهيألي تعليق أشرف خلص الكلام اللي انا كنت هاقوله
وعموماً انا متشكر جدا على الكلام اللي أكبر من قصيدتي ده
أخف دم :
يا باشا اننت دايما رافع من معنوياتي كده ربنا يخليك

Anonymous said...

سين حلم لا ينتهي
جميل يا درش بس عارف لو تحاول تقرا كتير وتتعلم عروض والحاجات دي هتبقي كويس وعلى فكرة أحيانا اللجوء للعنف المبرر بيساعد خلايا المخ والكبدة السندوتش بنص جنيه مصري غرق لما حصل تعويم للعملة خلى بالك م البحر يا مصطفى

tota said...

درش
عايزة اقولك ليه البحر بيشيل هموم وعمره ما اشتكى وسايع كل الهموم دى ازاى
لما تيجى موجة تمسح على سطحه تاخد من همومه وتجرى ترميها على الرملة البعيدة وتيجى موجة تانية وراها تاخد هموم تانى وترميها واحنا زى ما احنا نروحله ونرمى فيه همومنا وابدا ما نقولش كفاية

اللى يعبر السدود ويفهم المشاعر ويقول كلام يخرج من قلبه لقلب اللى سمعه يبقى قوته فى قلبه ده وعمر القلب القوى ما يكون فى انسان ضعيف

تحياتى

مصطفى حسان said...

توتا :
بس البحر مش عارف ليه ما بيحبش يتكلم معايا .. بحس انه دايما ساكت كده ومش عاوز يقول حاجه
زي ما يكون كاره الدنيا دي كلها

مصطفى حسان said...

سين حلم لا ينتهي :
لو تحاول تقرى كتير وتتعلم عروض والحاجات دي هاتقبقى كويس ؟؟
يعني إيه حاجات

vision said...

حلوووووووووووووووووووووه اوى اخص كنت فكراك انت الىكتبتها

بس بجد عجبتنى اوى منتا بردو الى اخترتها لأنك اكيد حسيتها

مصطفى حسان said...

ميرو :
أنا اسمي مصطفى حسان

وماتسألينيش اشمعنى حاطط اسمي تحت القصيدة كده
لان ماكانش هنا حد يعرف اسمي وانا بحس ان انا ممكن استعير اسم اكتب تحته اي حاجه مقالات مثلا لكن الشعر بحس اني لازم اكتبه تحت اسمي انا بس

Ranim Ayman said...

واووووووووووو
حلوووووووه اوي عجبتني اوي لما قرأتها باكتاب وقالت ادخل علي المدونة لما اقرأها بتبقي مختلفه ولعلمك حلوه اوي بعد ما سمعتها من حضرتك بجد بقيت حلوه اوي اكتر من لما اقرأها في الكتاب بس

تحياتي مبتسمة دائما
وياريت حضرتك تنورني في مدونتي المبتسمة