طَـلَـبْ إِعَــادِة نَـظَــر

السُّوس بينْخُر في الخشبْ ..

والعمر خَوَّخ من تباريح الغضب ..

لِمُّوا البواقي بالشَّبَك

ده البحر مِتْصَاب بِالْعَطَبْ

طَــــلَـــبْ إِعَــــــادِة نَــــظَــــــر

كان الولد بيحفَّر الحلم البسيط فوق الحيطان

واما الحياه تقفل له سكه

كان ياخدها سلبطه ..

ماياخدش باله ان الحياه والعمر حبة شخبطه

طباشيره دايماً ينكسر

وفْ كل مره يعيد خطوط الرسمه تاني من جديد

ماياخدش باله اذا كات حقيقه واللا طيف ..

يا لحظة الصدق الأخيره لما تتحول لزيف ..

راح اللي كان بيقضي يومه بضحكتين متزنقين

مع كام رغيف ..

قالوا زمان

البحر بيشيل الأمانه

لو حتى بان آسي وعنيد

عُمرهْ ماهايزود في يوم دمع الحزانى ..

ازاي هاندِّي البحر – في الآخر – خوانه ؟!

آخر النهار والبحر رايق
والسما صافيه ..

وشخبطة الولد مرسومه فوق سطح السفينه المزريه ..

أوقات تحس الموت وسيلة للحياه

وكتير قوي بيكون وسيلة تسليه

وكتير ما تعرفش اللي رايح راح لفين ..

ولا م الأساس كان جاي منين ..

يمكن مايبقاش شيء مهم

لكن مهم ان احنا نعرف ع الأقلْ

مين اللي بيموِّت..في مين ؟!

...

لو عشت مخلوع م الحياه

ولقيت في حلقك شوك

وصوتك مستحيل هاتوصَّـله ..

لو نُصك اصطاده السمك

لازم تموت وتحصَّـله

لو كنت دوقت ملوحة الدمعات

على خدود الفقير ؟!

كنت افتكرت البحر

برضه بْيبلع السمك الكبير

لو شالوا من جسمك ضلوع

وكمان يحطوا لك حرس ..

علشان ما تنطقش الدموع

فوق كل ده ..

تبقي انت حاسس بالخرس !

العدل مش نظرة أمل في عيون غلابه جوه قاعة محكمه

العدل نظرة للتشفي ف متهم جوه القفص

يا كل ألوان البشر

يا دمعتين على عمر متبعزأ هَدَرْ

الحكمة ..

خَطْفَهْ من تفاصيل النهايه المستحيله

واللا شقلبة الحقيقة بشكل ملفت للنظر؟!

...

طول عمرنا عايشين حياه

في طابور طويل واخدين حِزَا ..

دلوقتي ليه أحلام سنينك في الصوان متبروزه ؟!

إزاي عايزني احبس دموعي

لما اشوف دخلة صحابك في العزا !

بلمح تفاصيلك في صورتك

في الكتب

في الساعه

وفْ ريحة الهدوم ..

بيقولوا مات !!

مش برضه يابني انا كنت علمتك تعوم ؟!

من كام سنه

والشوق بيشرب م الغياب ..

يا توهة العمر المبعتر ع السكك

بلمح تفاصيلك في ترنيمة سراب ..

وانت المسافر وقت قلبي ما حن لك

طب حتى كنت ابعت جواب ..

ده الساعه بتحرك عقارب مربكه

والانتظار بيحول الدقات طبول ..

رايح وسايب كسرتي ؟!

طب كنت قبل ما تمشي قول ..

...

من كل ناحية الريح تهب وتخلع الزرعة ف ثواني ..

راحت هدر ..

وكأنها طلعت شيطاني ..

عشرين سنه ..

باتمنى جرحي يكون لأحلامك سكن

واقطع في قلبي عشان تحب

عشرين سنه .. وتموت كمان من غير كفن

أهو لينا رب ..

...

إيه اللي فاضل في الحياه

يا نقطة الميه اللي باقيه

من سراسيب المطر ..

ده الصبر بيكحل عيوني

من سواد العمر والليل الكئيب ..

ومابعترضش على القدر ..

أنا بس بطلب من عدالة المحكمة

إعادة نظر ..